BUTUAN CITY – Gipusil sa wala mailang responsable ang empleyado sa usa ka gasoline station nga nakabase sa lungsod sa Nasipit, Agusan del Norte, hinungdan sa pagka-igo sa iyang tuhod og pagkadala usab sa iyang koleksyon nga kapin sa P40 mil human siya gitulis pasado alas 10.45 kagabii.

Nasayrang gikan sa gasoline station sa lungsod sa Buenavista ang 22-anyos nga ulitawong si Daryl Cemine nga taga-Brgy. Kinabjangan, lungsod sa Nasipit aron pagkuha sa koleksyon human niya unang gikuha ang koleksyon sa Nasipit branch.

Apan paghidangat niya sa ngitngit nga dapit sa Brgy. Ata-atahon sakop sa Nasipit, gipig-id pig-iran na ang iyang gimanehuang multicab sa motorsiklong gisakyan sa duha ka suspek og dihang wala siya muhunong gipusil ang pultahan sa maong sakyanan nga milapos sa iyang tuhod hinungdan sa iyang pagka-ospital.

BUTUAN CITY – Padayong ang gihimong imbestigasyon sa mga sakop sa Bureau of Fire Protection-Butuan aron masayran kung asa naggikan ang kalayong mi-abo sa duha ka mga residential shanties, usa ka residential house og usa ka convenience store kaganinang alas 12:00 sa tungang gabii sa Purok 5, Brgy. San Ignacio ning siyudad.

Sigon ni FO3 Banjo Leyson, gibana-banang mu-abot sa usa ka milyon ka pesos ng damyos sa maong sunog nga mi-abot sa 4th alarm og napalong lang paglabay sa 20 minutos.

Lakip sa mga anggulong gitututukan ang nalimtang pagpatay sa kandila nga gigamit tungod sa brownout og ang pag-pot session sa usa ka grupo sa mga batan-on sa usa sa mga nasunog nga balay.

Lakip sa mga na-abo sa kalayo ang residential house sa usa ka Christine Chua og ang convenience store ni Ryan Culima.

BUTUAN CITY – Gitun-an karon sa local nga panggamhanan sa syudad sa Butuan apil na sa Sangguniang Panglungsod particular na sa Committee on Public Utilities ang sugyot sa DPWH nga Total closure sa Magsaysay Bridge.

Kini aron nga mapahigayun ang total rehabilitation kinsa duna nay gitagana nga pundo nga mukabat sa 50-million pesos.

Kini ang gipahayag ni Mr. Fred Radaza-ang hepe sa LTTMO-Butuan. Matud sa opisyal nga kung masugdan na ang pag-ayo sa maong Magsaysay Bridge, seguradong ipatuman ang re routing.

Apan giklaro ni Radaza, nga adesir sugdan ang rehabilitasyon, duna pay ipahigayung consultation nga tambungan sa mga sector nga posibleng maapektuhan sa maong proyekto ilabina ang transportation sector.

Kahibaluan nga nahuman na ang bidding sa maong proyekto ug go signal na lamang ang gihuwat, sugdan na gilayon ang pag-ayo sa Magsaysay Bridge.

BUTUAN CITY – Padayon karon ang gihimong imbestigasyon sa kapulisan sa Nasipit, Agusan del Norte aron masayran kung kinsa ang responsable pagpamutang sa tunga sa gallon nga gasolina nga duna pa’y panapton og plastic straw isip triggering device nga gibutang sa baba sa plastic gallon nga gibutang sa likod nga bahin sa pipila ka tindahan sa Brgy. Talisay sakop sa maong lungsod.

Ang nasangpit nga kagamitan, napalgan sa mga negosyanteng sila Charrie Sta. Maria, Lilibeth Sistoso og Erlinda Duran, pasado alas 11:00 kagabii sa gawas nga bahin sa pantalan sa maong barangay.

Gitu-uhang gibutang ang maong mga gamit dihang nag-brownout tungod kay wala’y tawong nakit-an dihang kini naalgan.

Kahinumduman nga ning mi-aging semana, nasunod ang usa ka tindahan sa susamang dapit apan wala kini makakatay sa laing establisamiento human daling napalong ang kalayo.

BUTUAN CITY – Hingpit nang niperma sa usa ka kasabutan ang panggamhanan sa Agusan del Norte tali sa International Labor Organization (ILO) aron matabangan ang mga mag-uuma sa natad sa panginabuhian pinaagi sa Innovative Dispersed Mechanism.

Subay niini, napili sa ILO ang paghatag prayuridad ngadto na sa mga lungsod sa Jabonga, RTR, Buenavista og Las Nieves pulos sakop sa maong probensya sanglit grabe kining na-apektuhan sa El Niño Phenomenon.

Gipamahayag ni Percianita Racho – Provincial Administrator sa Agusan del Norte nga gitakdang magpailawom sa usa ka workshop alang sa Comprehensive Farming and Valid Chain Analysis og Market Research Adoptation Options ang mga kadagkuan sa nahisgutang mga lungsod.

Gikalipay usab sa panggamhanang local nga usa ang probensya ang nahatagan og tabang sa ILO labi na sa agrikultura.

BUTUAN CITY – Bisan pa sa epekto sa El Niño Phenomenon sa Caraga, gi-awhag sa Bureau of Fishery and Aquatic Resources (BFAR) Caraga ang katawhan nga angayang motabang sa pagpalambo sa usa ka panginabuhian nga in-demand sa local nga merkado sama sa pagpamuhi sa isdang bangus.

Gipamahayag ni Rustico Ranuco – Regional Fish Caging Coordinator sa BFAR Caraga nga mamahimong mamuhi ang mga katawhan labi na niadtong nanimuyo sa coastal area.

Dugang ni Ranuco nga makatabang kini sa pagpa-angat sa panginabuhian sa usa ka pamilya.

Giklaro usab sa opisyal nga andam ang ilang buhatan pagtabang niadtong mokugi lamang usab sa pagbuhi isip kabahin sa ilang gipanumpaang tahas.

Gipasabot sa opisyal nga ning panahon karon, angayan nga dunay additional income ang usa ka pamilya aron usab nga mamahimong hamugaway ang pamuyo.

Kahibaluan nga dugay nang nagsugod ang nahisgutang buhatan sa maong programa og daghan na usab ang nakapahimulos niini.

BUTUAN CITY – Duna nay gipadala si PRO-13 Regional Director Lino Calingasan ug usa ka company sa Regional Public Safety Management Battalion sa Dapa ,Siargao Island ug usa ka platoon sa lungsod sa Taganaan Surigao del Norte.

Ang maong mga pulis ang augmentation force sa lugar aron maseguro ang kahapsay ug kalinaw sa maong mga lugar ug makrontola ang bisan unsa mang development nga posibleng mahitabo sa area.

Giklaro ni General Calingasan nga walay bisan usa ka pulitiko nga dapigan sa kapulisan.

Kung si kinsa matud pang makalapas dili nila kini paboran ug ang kapulisan igo lamang nga musunod kung unsa ang nakalatid sa balaud.

BUTUAN CITY – Padayon pa ang gihimong imbestigasyon sa kapulisan sa lungsod sa Alegria, Surigao del Norte aron pagtumbok og pagsikop sa mga tawong mipusil-patay sa bana sa kapitan sa Brgy. Camp Edward sa maong lungsod.

Sigon sa report, pa-uli na unta pasado alas 6:45 sa buntag ang 38-anyos nga biktimang si Teddy Salgarino, bana sa kasamtangang kapitan nga si Jojie Salgarino, dihang gipusil kini sa duha ka wala mailang responsable hinungdan sa hinanali niining kamatayon.

Daling girespondihan sa kapulisan ang maong hitabo kondiin narekober sa crime scene ang usa ka basiyo sa shotgun nga maoy gigamit pagtiro sa biktima.

BUTUAN CITY – Nagisi-an sa iyang ulo ang usa ka pulis human gipuspusan og botelya sa beer sa upat ka mga empleyado sa usa ka bar nga iyang gisudlan sa may Lopez Jaena St. ning siyudad.

Naila ang biktimang si PO1 Sherwin Salas, 31-anyos, minyo, mulupyo sa Brgy. Obrero ning siyudad og kasamtangang nadestino sa Butuan City Public Safety Management Company.

Sigon sa pulis, gihagad matud pa siya og inom sa upat ka wala mailang suspetsado nga iyang gibalibaran og paglabay sa pipila ka oras, misigting na lang ang iyang ulo tungod sa botelyang gihapak hinungdan sa iyang pagkaratil og dagan.

Ali siyang midangop sa kapulisan apan wala na sa maong lugar ang mga suspek dihang kini girespondihan.

BUTUAN CITY – I-apela sa probinsya sa Dinagat Island ang desisyon sa Korte Suprema nga nagdeklarang unconstitutional ang kamugnaan sa ilang probinsya.

Sigon ni provincial administrator Angela Elago, tumang kaguol ang ilang gibati dihang ilang nadunggan ang maong balita bisan og wala pa sila’y nadawat nga kopya sa maong desisyon.

Bisan pa man, kalma og relax nila kining atubangon dungan sa panghinaut nga unta ikonsidera ang ilang apela.

Kahinumdumang sa 30 ka pahinang desisyon nga gipirmahan ni Associate Justice Diosdado Peralta, gibutyag sa Korte Suprema nga ang Republic Act 9355-ang akta nga nagmugna sa probinsya sa Dinagat Islands ingom na sa article 2 sa Impelementing Rules and regulations sa Local Government Code of 1991, null void ang maong deklarasyon.

Kini sa rason nga ang land area requirement dili ma-apply diin ang gi-propose nga probinsya, gilangkuban sa usa o kaha kapin pa sa mga isla.

Sigon sa taas nga hukmanan, ang Dinagat Island, duna lama’y approximate land area nga 802.12 square kilometers og pakyas pagsunod sa land area requirement nga 2,000 square kilometers aron tugutan ang kamugnaan sa bag-ong probinsya.

Gawas niini, pakyas usab ang Dinagat pag-comply sa population requirement nga dili mu-ubos sa 250-mil ka mga mulupyo nga na-certify sa National Statistics Office.

Sa census population nga gihimo sa NSO, nasuta nga ang poulasyon sa maong isla niadtong Mayo tuig 2000, mi-abot lang sa 106,951.

Ang Dinagat usa sa tulo ka mga main group og islands  nga naglangkob sa Surigao del Norte sunod sa mainland og  Surigao City og Siargao Island og Bucas Grande.