CAGAYAN DE ORO CITY – Gitakdang isulod na lamang matud pa ug grapon ang kinatawo sa lalaki nga mismong nagputol niini dinhi sa dakbayan sa Cagayan de Oro.

Kini human narekober na sa pamilya sa biktimang si Hamever Sebelia ang kinatawo niini nga giingong gitaguan niya sa ilawom sa kama sa ilang kuwarto sa Brgy. Consolacion ning dakbayan.

Matud sa kapikas sa biktima nga nadismaya siya gihimong pagputol sa iyang mister sa kinatawo niini diin nagpasabot nga mawala na usab ang ilang pagparayganay.

Gibutyag usab sa kapikas sa biktima nga nag-antos sa apan sa pangisip ang iyang bana apan gipamugos niini nga mahal niya kini.

Nasayran nga dihang nahitabo ang kremin wala diha ang kapikas ug upat ka anak sa biktima hinungdan nakalugar kini paglunggo sa kinatawo gamit ang blade.

Sa pagkakaron, luwas na ang biktima apan nagpabilin pa sa Northern Mindanao Medical Center alang sa dugang medikasyon.

Kung hisgutan ang subling pagdugtong  sa iyang kinatawo, gikabutyag nga maglisod na ang doktor paghimo niini.

CAGAYAN DE ORO CITY – Nasikop sa kapolisan ang duha ka  babaye nga naghimo’g malaw-ay sa gitrabahuan niining body spa diha sa Kauswagan Highway ning syudad.

Kini human gironda sa mga otoridad gumikan sa giingong illegal nga transaction diin wala usab matud pa’y permit ang balay-patigayon.

Matud ni Deputy city police director Col. Antonio Montalba nga kung mahuman nila ang pagtigom sa mga ebedensiya gilayon nilang ipasaka ang tukmang kaso batok sa mga suspetsado ug bisan sa  tag-iya sa maong spa.

Nasayran nga ang pagdani matud pa sa maong patigayon mao ang ubos nga presyo sa ilang spa services apan kung sudlon makita ang malaking aquarium diin atua sulod ang mga hubong babayeng hubo ug andam moligo sa kustomer nga mga lalaki.

Gibutyag usab sa report nga kung magkasinabot ug moinit na ang gibati sa magka-opposite sex mosakay sila sa sakyanan padulong sa hotel ug didto himoon ang gitawag nga extra service bugti sa pipila ka pesos nga salapi gikan sa mga kustomer.

CAGAYAN DE ORO CITY – Duha ka kasong pagpanulis ang natala unang duha ka adlaw ning semanaha diha Bukidnon.

Maoy unang biktima sa wala mailang armadong kalalakin-an si Levy Joriolne, 44-anyos nga residente sa Misamis Oriental.

Gibutyag nga nagkarga’g saging sa ilang sakyanan ang biktima dihang gisaka sila sa mga tulisan hinungdan sa pagkakuha sa P80,000 nga salaping cash.

Gibiktima usab sa laing grupo sa mga tulisan ang laing babaye samtang nagbaklay lamang sa Malaybalay, Bukidnon.

Giila ang biktima nga si Seraich Salimbago, 32-anyos ug lumad nga taga Cebu City.

Nakuha sa mga misibat nga suspek ang P7,000 nga salaping cash gikan sa biktima.

Nasayran nga niadtong miaging duha ka buwan, sunod-sunod usab ang nahitabong pagpanulis sa Bukidnon diin hangtud karon inotil pa ang kapolisan sa pagsulbad sa maong mga kaso.

CAGAYAN DE ORO  CITY – Dili kumbinsido ang kapolisan nga gilugos ang usa ka dalaga sa suspek nga habal-habal driver diha sa Gusa ning dakbayan.

Kini human walay nakitang ilhanan nga gipugos paglugos ang biktima nga gitago lamang sa pangalang Leny ug residente sa Bukidnon.

Matud ni Police Insp. Warden Rojo, hepe sa Agora Police Station nga duha ka adlaw na silang nagpaabot sa biktima aron mosang-at ug sumbong apan pakyas kining makapatim-aw sa ilang buhatan.

Apan gibarugan usab sa mga nakarespondeng mga brgy police sa maong dapit nga may ilhanan nga nahilabtan ang biktima tungod sa kaluya niining nagpakitabang ngadto kanila.

Hisayrang modalikyat unta sa National Statistics Office ang biktima dihang wala siya direktang gihatod apan giliko sa hilit nga lugar ug giamung-amungan sa wala mailang suspek nga misibat human sa kremin.

Apan gipamugos sa mga barangay police nga nakaresponde sa insidente nga sobra ka luya ang biktima dihang ilang naabtan nga nagpakitabang ngadto kanila.

CAGAYAN DE ORO CITY – Tungod sa gugma, laing lalaki na usab ang naghikog patay diha sa El Salvador, Misamis Oriental.

Giila ang biktima nga si Erick Jaruala, 37-anyos, ulitawo ug residente sa maong lungsod.

Matud sa igsoon niining si Jerly Jaruala nga mibati sa grabeng kaguol ang biktima human nagminyo ug laing ang iyang hinigugma.

Hisayrang migamit ug habol ang biktima paghikot sa iyang liog ug may suicide note pa kining gibilin sulod sa iyang lawak.

Hinoon, giangkon sa pamilya sa biktima nga walay foul play ang kamatayon niini.

CAGAYAN DE ORO CITY-Kinse oras nga makasinati sa power rotating brown out ang syudad ug pipila ka bahin sa Misamis Oriental ning adlawa.

Matud ni CEPALCO Customer & Community Relations Dept. Sr Manager Marilyn Chavez nga bunga kini sa kamanduan gikan sa National Grid Corporation of the Philippines kon NGCP kanila.

Samtang subling mihangyo si Marilyn Chavez sa ilang mga konsumante nga sabton ang gipatuman nilang kada-adlaw nga pagputol sa supply sa kuryente.

Kini tungod kay tuyo lamang usab nila nga mabahin ang mga dapit nga mahatagan sa supply sa kuryente imbis nga mahimong mangitngit ang tibuok syudad ug lalawigan nga ubos sa ilang pagserbisyo.

Hisayrang gisugdan sa Cepalco pagpalong ang kuryente kaganihang alas 8:00 sa buntag paingon ala 1:00 sa hapon,ala 1:00 sa hapon ngadto alas 6:00 sa gabii ug gikan sa maong oras padulong sa 11:00 sa gabii.

Samtang dako na ang nasinatiang pagkalugi sa mga negosyante sa ilang patigayon dinhi sa dakbayan tungod sa sunod-sunod nga rotating power brown out sa pulo sa Mindanao.

Matud ni Oro Chamber of Commerce,Inc. Pres. Ralph Paguio nga tungod sa sige nga pagkawala nga supply sa kuryente daghang trabaho ang mabalda.

Nagpadayag usab sa suporta si Oro Chamber Pres. Ralph Paguio sa sugyot nga hatagan si Pres Gloria Arroyo ug emergency power aron sulbaron ang krisis sa kuryente sa Mindanao.

Kini sa kondisyon nga mapadali niini ang pagsulbad sa power crisis sa Mindanao.

Usa ka pagpanglingla ang nahitabo nga power crisis sa Mindanao ning panahona.

Kini ang panglantaw ni Fr Antonio Ablon kinsa convenor sa Kontra Daya Movement nunot sa sugyot nga hatagan emergency power si Pres Gloria Arroyo.

Si Fr Ablon miingon nga kung tugutan si Pres Arroyo sama ra nga gisurender na sa katawhan ang pagkigbisog niini alang sa kabag-uhan sa nasud.

Mga pagdungog sa kasong nasang-at sa korte,apektado sa power rotating brown out.

CAGAYAN DE ORO CITY- Detinado sa Police Precinct no.1 ang usa ka tinun-an human mabawii sa usa ka cellophane nga dahon sa marijuana sulod sa usa ka bar diha sa Divisoria ning syudad kaganihang kadlawon.

Giila ang suspek nga si Petro Tolentino, 34 anyos ulitawo ,tinun-an matud pa sa Bukidnon State University ug residente sa Balulang ning dakbayan.

Matud ni SPO1 Rolando Perolino sa Police Precinct no.1 nga hubog ang suspek dihang gipakita-kita niya ang maong druga sulod sa bar hinungdan sa pagkasikop niini.

Posibleng kasong pagsupak sa Republic Act 9165 o paghupot sa gidiling druga ang atubangon sa maong suspek.

CAGAYAN DE ORO CITY – Duha ang patay ug usa ang na-angol dihang gitabangan ug tigbas ang usa ka pamilya sa Talakag, Bukidnon.

Naila ang namatay nga sila si Tinoy Podkon ug iyang anak nga si Ellezer ug nadala sa ospital si Jonie Podkon.

Subay sa report, nagkabingkil ang mga biktima ug ilang silingan nga nagresulta sa pagpanigbas.

Diriyot maputol ang ulo ni Ellezer samtang naka-angkon sa ubay-ubay’ng samad sa lawas ang ilang amahan nga si Tinoy.

Sa pagkakaron, gipangita pa sa mga otoridad ang responsable sa maong kremin.

CAGAYAN DE ORO CITY – Patay ang usa ka 16-anyos nga lalaki human nabalintong ang iyang gimanehong motorsiklo diha sa FS Catanico, Cugman ning dakbayan kagahapon.

Naila ang biktima nga si Regner Meyaki ug molopyo sa maong lugar.

Nagmaneho sa motorsiklo ang biktima dihang nakabangga kini sa usa ka baka.

Naka-angkon ang biktima ug ubay-ubay’ng bun-og ug samad sa lawas nga nagresulta sa iyang kamatayon.

CAGAYAN DE ORO CITY- Gipasalig sa gobierno lokal sa Lanao del Sur sa Zenarosa Commission Against Private Armies nga walay mahitabong kagubot sa ilang lugar panahon sa piliay sa buwan sa Mayo ning tuiga sa nasud.

Matud ni Gov Bombit Adiong nga maghiusa ug magtibangay sila nga hatagan katumanan ang ilang gipirmahang peace covenant aron makab-ot ang hapsay ug tinood nga piliay.

Gipamugos usab ni Adiong nga walay bisan unsa wala’y private armies nga naglihok sa ilang lugar.Kamatuoran matud pa niini mao ang pagtambong sa mga opisyal gikan sa 39 ka lungsod sa probinsya aron ipakita sa komisyon nga sinsiro sila pagtuman sa kasabutan.

Apan ang pahayag ni Adiong nga walay private armies sa Lanao del Sur gisupak usab ni ARMM PNP chief Gen Beinvenido Latag.Si Gen Latag miingon nga sa tibuok ARMM moabot sa 63 ka private armies ang naglihok diin 22 niini gikan mismo sa Lanao del Sur ug usa ang kumpirmado na.

Gawas niini, 14 usab nagikan sa Maguindanao, 15 sa Tawi-Tawi, 5 sa Sulu ug 3 sa Maguindanao.Hisayrang ang Lanao del Sur maoy usa sa mga lugar sa Pilipinas nga gitutukan sa Zenarosa Commission tungod sa giingong presensiya sa private armies.

Una usab niini,natukod ug natahasan ang Zenarosa Commission human nahitabo ang masaker sa Maguindanao niadtong tuig 2009 diin 57 ka mga kinabuhi sa tawo ang nakalas.