CAGAYAN DE ORO CITY- Tulo ka mga daan apan mobutong bomba ang nakalutan sa mga bata sa usa ka barangay sa syudad sa Cagayan de Oro.

Subay sa Carmen Police Precinct nga nagdula matud pa ang mga bata  sa ilawom  sa mga punuan sa kawayan dihang aksidente nilang nakalutan ang duha ka 81 ug usa ka 61 mm ammunitions sa maong dapit.

Dugang pa sa kapolisan nga maayo na lamang nga gilayon kining na-report sa mga nakakita ang mga bomba tungod kay mahimo pa kining mobuto bisan nga gitaya na.

Miapela usab ang mga otoridad sa mga junk shops sa dakbayan nga dili paliton ang maong klase sa mga butang aron dili mabutang sa alanganin ang kaluwasan sa publiko.

KIDAPAWAN CITY – Nagpagawas og usa ka gatus mil pesos ang mga lokal opisyal sa siyudad sa Kidapawan ug probinsiya sa Cotabato sa mga tawo nga makatudlo batok sa mga suspek nga gitudlo nga responsable sa bag-uhay nga pagpamomba sa City Plaza sa naasoy nga dapit.

Gipamahayag ni Kidapawan City Mayor Rodolfo Gantuangco, nga ang mastermind sa pagbutang ug improvised explosive device sa Pavillion building duol sa City Hall, gipangulohan sa usa ka Kumander Mozalie Cado, miyembro sa Alkhobar terror group nga nakig-alayon sa Lawless Moro Islamic Liberation Front (MILF) group.

Matod ni Cotabato Governor Jesus Sacdalan nga si Cado, mi-iskapo sa Amas Provincial Jail niadtong tuig 2006, human kini gi-rescue sa iyang mga kauban ug giatake ang prisuhan.

Ang grupo ni Cado,responsable sa extortion, pagpamomba sa mga unit sa Weena Bus Line, Yellow Bus og Davao Metro Shuttle.

Ang pagpamomba sa Kidapawan, panimalos ngadto kang Mayor Gantuangco gumikan sa pagkasikop sa mga opisyal sa Alkhobar ug pagmagahe niini sa gipangayo nga extortion money sa mga suspek.

Gumikan sa naasoy nga hitabo gimando ni Governor Susing Sacdalan sa kapulisan, inabagan sa militar nga ipatuman gilayon ang warrant of arrest batok  sa grupo ni Cado ug palig-unon pa ang seguridad palibot sa probinsiya sa Cotabato. (Bombo Garry Fuerzas)

NORTH COTABATO – Usa ka miyembro sa lawless Moro Islamic Liberation Front (MILF) group ang napatay sa bag-uhay nga panag-ingkwentro sa Central Mindanao.

Sigun sa taho gikan sa 6th Infantry (Kampilan) Division Philippine Army, pinaagi kang Colonel Julieto Ando, nasayran nga banda alas 5:40 sa hapon, Pebrero 22, gipabuthan ug mga bala sa 60mm mortar ang mga rebelde ang CVO/CAFGU outpost sa sitio Giling, Barangay Upper Dado, Alamada, North Cotabato, apan didto kini mi-igo sa mga bakanteng lote ug walay nasamdan, gawas lamang sa sobrang kahadlok nga gibati sa mga sibilyan.

Mibalos gilayon ang militar og gi-bombahan ang posisyon sa mga rebelde gamit ang 81mm mortar ug 90rr bazooka.

Resulta usab ang napatay sa MILF ug ubay-ubay ang nasamdan, naghangyo si Alamada Municipal Mayor Ernesto Concepcion sa MILF nga mobalik sa ilang mga kampo, gidugang ni Concepcion nga maayo ang relasyon tali sa mga kristiyano ug muslim sa naasoy nga dapit apan nasamok sa diha nga misulod ang mga rebelde.

Gi-aprobahan na usab ni 6th ID Chief M/Gen. Alfredo Cayton ang pagbansay-bansay ug mga Cafgu gikan sa naasoy nga dapit nga mutabang sa pagpatunghay sa kahapsay ug kalinaw sa Alamada. (Bombo Garry Fuerzas)

COTABATO CITY – Gibuhian na sa mga kidnappers ang negusiyanteng Tsinoy nga si Wilson Tan og iyang anak nga si Jennifer nga gidagit sa dakbayan sa Cotabato.

Gipamahayag ni Cotabato City Police Director S/Supt. Willie Dangane, nga banda alas 9:45 sa gabi-i, Pebrero 22, gi-abandona sa grupo ni Kumander Hadji Musa Ali sa Pintagon, kidnap gang ug gibilin ang mga biktima kilid sa kalsada sa Barangay Brar, Talayan, Maguindanao province, diin nakit-an kini sa mga nagpatrolyang sundalo ug dali-dali nga gidala paingon sa luwas nga dapit.

Matod ni 6th Infantry (Kampilan) Division Philippine Army, spokesman Colonel Jonathan Ponce nga posibling na-pressure ang mga suspek ug napugos sa pagbuhi sa mga biktima, gumikan sa kadaghan sa puwersa sa militar nga milutos niini.

Gidugang ni Cotabato City Mayor Muslimin Sema, nga gibuhian sa mga armado ang mga biktima gumikan sa hiniusang tabang sa mga lokal opisyal, MNLF, militar, kapulisan ug MILF og walay nahatag nga ransom money sa mga kidnappers.

Giklaro ni Wilson Tan, sa pakighinabi sa Bombo Radyo nga sa lima ka adlaw nga anaa sila sa grupo ni Kumander Hadji Usman Ali, wala silay ilis-ilis ug sinina, asin lang ang sud-an og pabalhin-balhin ug lugar, hinuon maayo man ang pagtratar sa ila sa mga kidnappers.

Ang Tsinoy nga si Wilson Tan,inilang negusiyante sa siyudad sa Cotabato, tag-iya sa First Trading Hardware og Cofico Grocery Store, nga gidagit sa unom ka mga armadong kalalakin-an sa diha nga iyang gisundo ang iyang anak nga nagtungha, lima na ka adlaw ang nakalabay. (Bombo Garry Fuerzas)

COTABATO CITY – Usa ka inilang negusiyanteng Tsinoy og anak niini gidagit sa mga armado sa dakbayan sa Cotabato.

Ang kapulisan nag-ila sa mga biktima nga mao si Wilson Tan, 50-anyos, minyo, tag-iya sa First Trading Hardware ug Cofico Grocery Store ug iyang 10-anyos nga anak si Jennifer.

Sigun sa taho gikan sa Cotabato City Police Office nasayran nga banda alas 4:45 sa hapon, Pebrero 18, samtang sakay ang Tsinoy sa Mazda Van gikan nagsundo sa iyang anak  sa tulunghaan, pasulod na kini sa ilang pinuy-anan,sa diha nga kalit kining giharang sa unom ka wala mailhing suspek, armado og rocket propelled grenade (RPG) M16 armalite rifle ug M14, nakasukol pa ang mga escort sa mga biktima, apan wala kini mosilbi sa mga tag-as nga matang sa armas sa mga kidnappers, nga midala sa mga biktima sa sitio Camasi, Barangay Rosary Hieghts 9, kilid sa Rio Grande De Mindanao,gisunog ang Van, pagkahuman gibalhin ang mag-amahan sa naghulat nga pumpboat paingon sa hilit nga dapit sa Kabuntalan, Maguindanao province.

Hangtud sa kasamtangan nagpadayon ang pursuit operation sa hiniusang puwersa sa militar ug kapulisan nga gipangulohan mismo ni 6th ID Chief M/Gen. Alfredo Cayton og Cotabato City Police Director S/Supt. Willie Dangane aron marescue ang mga biktima.

Gipamahayag ni 6th ID Spokesman Colonel Jonathan Ponce, nga posibling mga miyembro sa Pentagon kidnap gang o kaha lawless MILF group ang midagit sa mga biktima.

Nanggawas ang taho palibot sa siyudad sa Cotabato nga nangayo ug P10 milyunes ang mga kidnappers ngadto sa pamilya sa biktima apan wala pay kompirmasyon ang otoridad. (Bombo Garry Fuerzas)

NORTH COTABATO – Usa ang patay og upat ang grabeng na-angol sa diha nga gibanggaan sa cargo truck ang usa ka motorsiklo sa Makilala, North Cotabato.

Ang kapulisan nag-ila sa hingkabsan sa kinabuhi nga mao si Patricia Tuadles, 60-anyos, minyo, samtang grabeng nasamdan usab ang iyang mga silingan nga sila Ryan Gaski, asawa niya nga si Jennifer, ug mga anak nga sila Jenny, 4; Joy, 2, mga molupyo sa Poblacion, Makilala.

Subay sa nahagdaw nga taho gikan sa Cotabato Police Provincial Office, nahibaluan nga banda alas 11:00 sa gabi-i, Pebrero 10, samtang sakay ang mga biktima sa habal-habal nga motorsiklo gikan sa siyudad sa Kidapawan, pag-abot niini duol sa Poblacion Proper, gibanggaan kini sa naghagoros nga Ten Wheller Cargo truck, hinungdan nga nangalagpot ang mga biktima ug nakumos-kumos ang ilang gisakyan nga motor.

Human sa hitabo mipatoratoy lang sa pagpadagan ang nakabangga paingon sa Davao Del Sur samtang ang mga biktima ang dali nga gisapupo sa mga molupyo sa naasoy nga dapit ug gidala sa Makilala Medical Specialist, apan hingkabsan gyud sa kinabuhi si lola ug puros anaa sa kretikal nga kahimtang ang iyang mga kaubanan gumikan sa grabeng samad, bali ug pangos sa nagkadaiyang parte sa ilang kalawasan.

Matod ni Martin Ranes, nga nakakita sa hitabo nga kusog kaayo ang dagan sa cargo truck ug wala gyud kini mihunong sa diha nga gisungag niini ang motorsiklo nga gisakyan sa mga biktima.

Ang kapulisan ang padayong nag-imbestiga aron mailhan ang drayber sa ten wheller cargo truck ug kapasakaan og tukmang kaso sa naasoy nga disgrasya. (Bombo Garry Fuerzas)

NORTH COTABATO – Tulo ka mga giilang leader sa Front Committee 72 sa New Peoples Army na-angol sa ingkwentro sa Tulunan, North Cotabato, kini ang gikomperma ni 57th Infantry Battalion Philippine Army Commanding Officer Colonel Milfredo Meligrito.

Gipamahayag ni Danilo Malagante, usa sa mga Npa nga nadakpan sa kasundaluhan nga samdan sila Felix Armodilla, Efren Tao-taw ug Jojo Pabillo, igsuon ni Pebro Pabillo alyas kumander Jek-jek nga napatay atol sa ingkwentro sa Barangay Bakong, Tulunan.

Gidugang ni Colonel Meligrito nga ang tulo puros mga opisyal sa Far South Mindanao Command NDF/CPP/NPA hangtud sa kasamtangan nagpadayon ang paglutos sa militar sa mga rebelde nga nagtago-tago sa utlanan nga parte sa Tulunan Cotabato og Davao Del Sur.

Misaka na ang ihap sa mga sibilyan nga namakwet gikan sa mga apektadong dapit gumikan sa gipakusog nga operasyon sa puwersa sa kagamhanan batok sa mga NPA nga gitumbok nga responsable sa pagpamanhig patay sa grupo ni Bansalan chief of police, S/Insp. Emilex Mabalot.

Nagreklamo usab ang mga molupyo sa mga lugar nga na-apektuhan sa kagubot gumikan gipangawat ang ilang mga binuhing kahayupan,mga tinanom nga lagutmon, apil na ang mga sinakong bugas nga mais ug humay sulod sa ilang bay nga posibling hinimuan sa mga rebelde. (Bombo Garry Fuerzas)

NORTH COTABATO – Usa sa mga nalambigit sa pagdagit og paglugos sa 18-anyos nga HRM student sa University of Southern Mindanao, Kabacan niadtong nakalabay nga tuig, nasikop sa Pikit, North Cotabato.

Ang kapulisan nag-ila sa suspek nga mao si Erica Bianca Enanoria, nga pag-umangkon sa gitumbok nga mastermind sa pagpanamas-tamas sa usa ka Alyas Angelyn nga si Datu Montawal, Maguindanao Province, ABC President, Councilor Datu Andy Montawal.

Sigun sa taho gikan sa Cotabato Police Provincial Office, nasayran nga banda alas 10:20 sa buntag, Pebrero 10, nasiplatan sa mga pulis nga gipangulohan ni S/Insp. Elias Dandan,ang suspek nga palibot-libot sa public market, sa Poblacion, Pikit, hinungdan nga dali-dali kining gisikop sa otoridad basi sa warrant of arrest nga gi-isyo ni Kidapawan City Presiding Judge Francis Palmones ug gibalhog gilayan kini sa Cotabato Provincial Jail.

Nagpasalamat usab ang pamilya ni Angelyn sa pagkadakop sa suspek,apan hangtud karon dismayado pa gihapon kini gumikan kawasnon pa si Councilor Andy Montawal ug anak niini nga maoy milugos sa dalaga.

Gipamahayag ni Cotabato Police Provincial Director Supt. Renato Hiso nga naningkamot pag-ayo ang ilang mga ginsakpan nga masikop ang mga suspek, apan nagtago-tago na kini sa mga hilit nga dapit sa Maguindanao, resulta nga naglisod gyud sila sa ilang operasyon. (Bombo Garry Fuerzas)

NORTH COTABATO – Duha ka mga miyembro sa lawless Moro Islamic LIberation Front (MILF) group ang napatay og usa ang na-angol sa mga sakop sa Citizen Armed Force Geographical Unit (Cafgu) sa pinaka-ulahing panag-ingkwentro sa Central Mindanao.

Subay sa nahagdaw nga taho gikan sa 6th Infantry (Kampilan) Division Philippine Army, nga banda alas 4:40 sa hapon, Pebrero 8, gipaulanan ug mga bala sa 60mm mortar og rocket propelled grenade (RPG) sa lawless MILF nga gipangulohan ni Kumander Rambo, ang detachment sa Cafgu ug 68th Infantry Battalion Philippine Army, sa sitio Sarmiento, Barangay Upper Dado, Alamada, North Cotabato, apan dali kining nabantayan sa puwersa sa kagamhanan, resulta nga gi-bombahan ang posisyon sa mga rebelde gamit ang 105mm howitzers cannon.

Miatras ang mga rebelde, biniyaan ang ilang duha ka mga kaubanan nga wala nay kinabuhi, diin nakuha gikan sa posisyon niini ang mga assorted nga tag-as nga matang sa armas ug mga buhing bala samtang usa usab ang natapsingan sa bukton sa mga ginsakpan sa Cafgu.

Gipamahayag ni 68th Infantry Battalion Philippine Army Commanding Officer Lt/Colonel. Glen Flores nga kadaghanan sa mga MILF nga nag-akupa sa utlanan nga dapit sa Buldon, Shariff Kabunsuan province og Alamada, naggikan pa sa Lanao Del Sur.

Plano sa naasoy nga grupo nga himuon nga kampo ang naasoy nga lugar gumikan high ground kini ug nahisakop duol sa kanhing nabungkag nga Camp Abubakar. (Bombo Garry Fuerzas)