DAVAO CITY – Wala igkita si Bureau of Customs (BOC) Port of Davao District Collector Anju Nereo Castigador sa dihang ang unom ka mga konsehal miduaw sa iyang opisina.

Kini may kalabutan sa kwarenta ka mga sako sa bugas nga gisakay sa usa ka container van nga gibabagan sa naasoy nga aehnsiya.

Alas dies kagahapon sa buntag sila si City Councilor Danilo Dayanghirang, Nilo Abellera, Leonardo Avila, Samuel Banggoy, Susabel Reta, ug Pilar Braga nadismaya sa dihang wala igkita sa iyang buhatan ang BOC Davao Chief ilang gipakigkita unta sa iyang buhatan.

Sumala pa kang konsehal Nilo Abellera dili kini ang labing unang higayon nga si Castigador ug lain pang duha ka mga kaubanan mibalewala sab sa konseho atol sa committee hearing nga gipahigayon sa committee on peace and public safety committee ni City Councilor Nilo Abellera.

Sulod sa buhatan ni Castigador ang mga konsehal mi-demand nga makighinabi kang Castigador ug ang aide niini mitawag sa mobile phone sa BOC chief ug gihatag ang cellphone kang Abellera ug nahitabo ang ilang panaghinabi sa nahisgutan kalabot sa sinakong bugas nga gipugngan sa BOC.

Sa kasamtangan wala pa naghatag sa iyang kongkretong pamahayag anng naasoy nga konsehal kalabot sa ilang nahisgutan ni Castigador.

DAVAO CITY – Tulo ka mga bomb scare ang sunod-sunod nga gi-respondihan sa mga otoridad karong adlawa.

Kini human makaplagi ang duha ka mga bomba kagahapong adlawa sa CR sa City Hall ug sa gate sa Central Bank kagahapon.

Una nga nagkaguliyang ang mga tao sa gawas sa Sanguniang Panglungsod gumikan sa bag nga gisangit sa railings sa entrance door niini.

Pipila minuto ang milabay, paspas nga miresponde usab ang bomb squad sa Unitop atbang sa City Hall sa dalang San Pedro ning syudad gumikan sa usaka plastic bag nga color blue nga gibilin sa baggage counter sa nahisgutang tindahan.

Dihang gisuta, walay nakaplagan nga mga eksplosibo ug bugtong duha ka mini DVD player lamang ang sulod niini.

Ug ang ika-tulo nga bomb scare nahitabo sa Rizal Memorial Colleges (RMC) human maalarma ang mga estudyante sa gibilin nga karton kilid Comfort Room sa Elementary Department.

Bisan ug pulos negatibo ang tulo ka mga bomb scare, gikalipay lamang gihapon sa kapulisan sanglit abtik ang katawhan sa pag-report sa mga katahapang mga butang nga ilang namatikdan.

DAVAO CITY – Gikatakda na ugma sa panel of prosecutors ang clarificatory hearing kalabot sa kasong murder nga gi-atubang ni Buluan Vice-Mayor Esmael “Toto” Mangudadatu ug sa duha niya ka mga security escorts.

Apan gikanayon ni i City Prosecutor Gemma Dabay-Tambis nga hisgutan yna sa matag pikas nga bahin kung asa nga sa City Prosecutors Office ipahigayon ang nahisgutang pagdungog.

Gitin-aw usab ni Tambis nga sa pagka-karon dili una sila makahatag ug dugang detalye sa maong pagdungog gumikan sa pipila ka mga security reasons.

Ang panel mituon sa paggamit sa nakuha nga video footage sa gika-ingong pagpamusil sa milabay nga Huwebes, Pebrero 11, sa Gaisano South Citimall.

Lain pang saksi ang una nga gipa-atubang sa legal counsel ni Natividad Arce Kamendan, asawa ni Tamano Kagi Kamendan isip tipik sa ilang tubag sa counter affidavit nga giduso ni Mangudadatu ug sa iyang mga escort nga sila si PO1 Surab Lintakan Bantas ug PO1 Ibrahim Langalen.

Gikiha ang tulo ug kasong murder gumikan sa kamatayon ni Tamano Kamendan, close-in security aide ni Andal Ampatuan Sr.

DAVAO CITY – Gikatahapan nga dugay nang nagbaton ug panagkunsabo ang usaka Barangay Captain ug pipila ka mga kawani sa DENR sa probensiya sa Davao del Sur sa walay kasulbaran nga illegal logging sa nahisgutang probensiya.

Na-una nang gika-report ga gipanag-iyahan ni Barangay Captain Rey Aballe nga taga Aplaya Village, Digos City ang truck nga gikargahan sa illegal nga mga pinutol nga kahoy nga nakompiska sa tiilan nga bahin sa national park sa Mt. Apo, Binaton, Digos City.

Subay sa report sa Community Environment and Natural Resources sa Digos City walay mga legal documents nga gi-presenta ang driver sa usaka Elf nga dunay plate number GFE 664 nga maoy nagkarga sa gibana-banang tres mil ka board feet sa mga illegal nga puntol nga kahoy nga Mahogany ug Gmelina.

Dali nga mi-abot sa maong dapit ang mga personahe sa DENR-province aron pagsuta sa nahisgutang mga kahoy ug giduol kini ni barangay Captain Rey Aballe diin nahitabo ang sumala pa usaka negosasyon.

Gibuhian sa DENR personnel ang truck dungan sa panaad sumala pa ni kapitan Aballe nga sunod adlaw iya nang ikapakita ang ang mga papeles nga nagpamatuod nga na-comply niini ang supporting documents to release sa DENR officer.

DAVAO CITY – Temporaryong gi-dili una ang pagbisita sa mga piniriso sa Davao City Jail sa Maa, Davao City.

Kini ang gipahibalo karon ni Sr./Insp./Ian Glen Oclin nga tumong sa suspension sa pagbisita sa mga pinirisio ang ilang seguridad ilabina na nga kadaghanan kanila mibati ug grabe nga kalisang human mapusili ug napatay ang usa ka inmate dihang misulay kini sa pag-atake sa usaka jail guard.

Sa pagkakaron dili pa makahatag og impormasyon ang jail warden kung kanus-a molungtad ang suspension, apan gipanaad nga iyang ipahibalo gilayon sa higayon nga hingpit nang wagtangon ang kamanduan.

Kahinumduman nga patay na dihang miabot sa Davao Medical Center ang piniriso nga si Rey Aragon Angeles, 26 anyos, taga Calinan syudad sa Dabaw ug adunay murder case kinsa nasulod sa prisuhan niadtong Pebrero 24, 2009.

Duha ka samad sa likod nga bahin ang naangkon ni Angeles human gipusil sa jail guards gumikan sa tinguha nga pag-atake sa mga guwardiya.

Gikanayon ni Insp. Oclin nga armado ang piniriso ug improvised icepick butang nga buot nilang masuta kung asa kini naggikan.

DAVAO CITY – Gisulod sa mga otoridad ang balay sa secretary ni ARMM Gov. Zaldy Ampatuan nga si Arturo Moreno Jr. sa Libby Road Barangay Bago Gallera, Talomo district ning syudad asa Dabaw.

Apan wala ang presensiya ni Art Moreno Jr. sulod sa iyang pinoy-anan.

Gisulod usab sa kapulisan ang balay sa amahan ni Moreno nga si Arturo Moreno Sr nga nahimutang sa kasikbit lamang niini.

Gipasiugdahan mismo ni Davao City Poice Office Director Police Senior Supot. Rene Aspera ang nahisgutang operasyon dala ang search warrant gikan sa korte.

Gibutyag ni Aspera nga nakahimo sila sa pagrecover ug duha ka matang sa armas nga gilangkuban sa usaka 9mm ug cal .22 rifle ug mga magazines niini.

Wala mipakita ug pagsukol si Art Moreno Sr. sa dihang gidala sa kapulisan aron kahimuan ug dugang imbestigasyon.

DAVAO CITY – Sa kamangtas ni Ka Jinggoy, Elizalde Cañete, 21, residente ng Monkayo mas nahimo siyang inila sa lalawigan sa Compostela Valley Province.

Sa pagsubays sa Bombo Radyo Davao, nasayran nga grupo ni Ka Jinggoy ang midagit kang 1Lt. Marjun Gatela, sila sab ang midagit kang Sgt. Reyes sa Canidkid, Montevista, ingon man sab ang namatay na nga Kapitan sa Barangay nga si Mahumas.

Niadtong 2008 nabihag sab nila ang dakung opesyal sa kasundalohan 1Lt. Vicente Camayo, 2009 nahimo nilang bihag si Sgt. Dominador Alegre, ang detachment commander sa Monkayo, Comval.

Sila sab ang mirakrak sa tropa sa kasundalohan nga gikan nga namista nga gika-angol sa Estancia sisters, patay sab ang batang si Kal Malnegro sa dihang gipusil patay ang tawo nga gikatahapan nila nga impormante sa militar.

Daghanan pa gayud nga mga pagpanghasi nga binuhatan sa Front Committee Three nga  gipangunahan  ni Ka Jinggoy.

Trese anyos pa lamang si Ka Jinggoy sa dihang mipasakop sa rebeldeng kalihukan, karon baynte uno anyos na siya.

Kaniadto gipahayag ni Ka Jinggoy nga malagmit nga mo-surrender siya sa dihang matigulang na.

Apan human sa engkwentro sa Barangay Sarmiento, Laak, Comval nahimong sayo, kaysa una niyang gipasi-atab ang iyang pagsurender.

DAVAO CITY – Walay kaso nga gipasaka ang kapulisan batok kang ARMM Assemblyman Khadaffy Mangudadatu ug sa mga security escorts niini nga na-una nang gikareport nga naghupot ug mga armas nga kulang ug mga dokumento.

Gikanayon ni Police Chief Insp. Miel Grace ang Chief of Police sa lungsod sa Matanao, Davao del Sur napahapsay gilayon ang problema labot sa mga papeles sa upat sa unom ka mga security escorts ni Mangudadatu sa gihuptan niining mga armas.

Si Assemblyman Mangudadatu ang dunay kuyog nga unom ka mga escorts nga gilakipan sa duha ka mga sundalo nga sila Corporal Ernardo Patricio ug PFC Reynante Alcalde sa 46th Infantry Battalion sa Philippine Army ug upat ka mga police nga sila PO1 Johali Panigas, PO3 Amohar Mangilin Mosali, SPO3 Roger Mangudadatu ug PO1 Padaki Ali.

Na-una nang migawas ang report nga si Mangudadatu kuyog sa iyang unom ka mga escorts ang mipaturatoy sa mag Barangay Cogon, Digos City.

Dugang gikanayon ni Insp. Grace nga walay gihimong pagsukol ang mga escorts sa politiko sa dihang gi-rekisa kini sa kapulisan.

DAVAO CITY – Gihukman og “reclusion perpetua” sa Davao Regional Trial Court ang usa sa limang akusadong nag-atubang sa kasong “multiple murder ug multiple frustrated murder” sa nahitabong “twin bombings” dinhi sa siyudad niadtong tuig 2003.

Sa gipaggawas nga “promulgation order” ni RTC Branch 12 Judge Pelagio Paguican, 20 ka tuig nga pagkabilanggo ang pagatubangon nga pagkabilanggo ni Tu Akmad samtang  “acquitted” usab ang mga kaubanan niini nga sila Esmael Mamalangkas, Ting Idar, Tohame Bagundang Ulong ug Jimmy Balulao sa kaso niini sa Sasa Wharf bombing niadtong Abril 2, 2003.

Sumala ni Prosecutor Minerva Pepino-Estremos, ang government prosecutor sa maong kaso, nga sa lima ka akusado si Akmad lamang ang postibong gitumbok sa testigo nga mao matod pay nagdala ng usa ka karton nga gisudlan sa bomba, pipila ka minuto una kini nibusikad.

Daugang pa sa order sa huwes nga moabot og P250,000 pesos ang bayronon  nga damyos ni Akmad sa mga kabanay sa mga nahimong biktima.

Samtang sa kaso usab sa nahitabong Old Airport bombing niadtong Marso 4, 2003, gipakawaly-sala ang tanang akusado sa kasong “multiple murder ug frustrated multiple murder” gumikan sa kahinay sa ebidensiya sa Prosecution nga maduot  ang mga nahisgutan sa ngilngig nga pagpamomba.

Kahinumdumang moabot sa 38 ang natalang namatay ug halos 190 usab ang samaron sa duha ka pagpamombang gipasangil sa Moro Islamic Liberation Front, Abu Sayyaf Group ug Jemaah Islamiyah apan gipanghimakak usab kini sa mga akusado.