GENERAL SANTOS CITY-Gikumpirma ni Orly Sabelita, ang presidente sa Socksargen Transport Federation nga nagpadayon ang ilang hangyo alang sa usbaw sa pletihan sa mga pampublikong sakyanan susama sa jeep, multicab ug L300 van.

Matud ni Sabelita nga bag-uhay lamang niya naistorya ang labaw sa Land Transportation Franchising and Regulatory Board (LTFRB) nga si Alberto Suansing ug gituki ang ilang hangyo nga uno singkwenta pesos.

Apan gitino ni Sabelita nga natanggong sa pagtuki ang ilang petisyon tungod na usab sa saka panaog nga presyo sa krudo ug gasolina.

Giklaro usab ni Sabelita nga dili na sila mangayo og usbaw sa pletihan kong ang presyo sa krudo mokabat na lamang sa 35 pesos kada litro.

Sa pagkakaron nga miusbaw ang presyo sa krudo og ipursige usab nila ang hangyong usbaw sa pletihan.

GENERAL SANTOS CITY – Nasenatian karong adlawa ang labing init nga temperatura dinhi sa General Santos City kon itandi kagahapon nga gikanayong adunay labing init nga panahon sa tibuok nasud.

Base sa rekord sa Pagasa-Gensan, miabot na sa 36.4 degrees Celsius ang temperatura sa Gensan karong adlawa.

Misamot pa gayud ang nabatyagan nga kainit sa panahon gumikan sa nasenatiang brownout kon asa ang pipila ka lugar nakasenati na ug 15 hangtud 17-ka oras nga brown-out.

May kalabutan niini, gitambagan sa City Health Office ang publiko nga mag-amping sa mga sakit nga mugna sa grabeng kainit sa panahon ug muinom kanunay ug tubig aron makalikay sa dehydration.

kahinumduman nga nasenatian na usab sa Gensan ang grabeng kainit sa panahon kaniadtong Abril 14, 2009 kon asa natala ang 39 degrees Celsius nga temperatura.

GENERAL SANTOS CITY – Miabot na sa P17 milyones ang damyos sa mga pananum sa humay ug kamaisan sa General Santos City tungod sa hulaw.

Kini ang gikumpirma sa City Agriculture Office pinaagi ni Merlinda Donasco sa Bombo Radyo Gensan.

Matud pa niini nga sa produksyon sa mais, kapin sa 1,189 ka ektarya sa kamaisan ang nadaut ug adunay katibuk-ang damyos nga P15.8 milyones samtang sa humay, kapin usab sa 114 ka ektaryas usab ang nadamyos nga nagkantidad sa usab ug P2.3 milyones.

Dugang pa ni Agriculturist Merlinda Donasco nga ang namugnang damyos nagsukad pa sa ulahing quarter sa miaging tuig.

Ang mga barangay nga adunay mga pananum sa mais nga nadaut tungod sa hulaw mao ang Batomelong nga miabot sa 154 ka ektaryas; Bawing – 29 ka ektarya; Conel – 153 ektaryas; Katangawan – 10 has; Mabuhay – 110-has; Barangay Olimpog – 309 has; San Jose – 62 has; Sinawal – 87 has; Tinagacan – 150 has; Mabuhay – 55 has; ug Upper Labay – 58 has.

Samtang sa humayan, ang apektadong barangay mao ang Barangay Baluan – 20 ektaryas; Buayan – 20 has; Katangawan – 20 has; Barangay Ligaya – 18 has; San Isidro – 20 has. ug sa Tinagacan – 15 ka ektarya.

Samtang sa sunod semana, ipahigayon sa DA ang cloud seeding aron nga makasenati ug ginagmay nga pag-ulan dinhi sa Gensan.

GENERAL SANTOS CITY – Nagkasamot ang problema sa power supply sa Socsargen tungod makalima ka higayon na nga nasenatian ang brown-out, ka-3 ka higayon sa adlaw ug ka-2 ka higayon sa gabii.

Daghang negosyante na ang nagreklamo tungod apektado na ang ilang mga negosyo.

Pipila sa mga negosyong grabeng naapektuhan tungod sa kanunay nga pag-brown-out mao ang ice-cream nga imbis nga halinon karong panahuna tungod sa ka-init sa panahon, dili na hinuon mapalit tungod melted na.

Samtang gibutyag sa Socoteco-2 nga dili na nila masunod ang tag-usa ka oras nga rotational brown-out sa nagkadaiyang dapit sa Gensan gumikan samot nga gakunhod ang supply sa enerhiya gumikan sa padayong pag-ubos sa level sa tubig sa Lake Lanao sa lanao del Sur ug sa Pulangi river sa Bukidnon.

Sa laing bahin, gibutyag sa Department of Agriculture-Gensan nga mukabat na sa P3-milyones ang damyos sa humayan sa dakbayan.

Pipila ka lakang karon nga gihimo sa DA-12 aron nga makunhuran ang epekto sa El Nino mao ang pagpahigayon ug cloud seeding ug pagpanghatag ug semilya sa mga utanon sa mga mag-uuma.

GENERAL SANTOS CITY – Giila sa General Santos City ug South Cotabato nga adopted son ang labing adunahang tawo sa nasud nga si business tycoon nga si Dr. Lucio C. Tan.

Nahidangat dinhi sa Gensan ang nasangpit nga tag-iya sa PAL, mga bangko ug ubang dagkong negosyo sa nasud kaganihang buntag ug nakigtagbo sa Fil-Chinese Chamber of Commerce and Industry ug mga lokal nga opesyal sa General Santos City ug South Cotabato.

Gipresenta ni Gensan Mayor Pedro Acharon, Jr. ang Sangguniang Panlungsod Resolution number-513 series of 2009, samtang si South Cot. Boardmember Jose Falcon ang nagpresenta usab sa Sangguniang Bayan Resolution number-10 series of 2010, kon asa ilang giila si Dr. Tan isip adopted son.

Matud pa ni Mayor Acharon, nahidangat ang maong negosyante sa dakbayan pinaagi sa tabang nila ni kanhing Gensan Mayor Adelbert Antonino ug Congresswoman Darlene Antonino Custodio.

Tungod niini, galaom ang mga opesyal ug mga negosyanteng Tsinoy nga daghang mga negosyo ang mapatukod sa Gensan ug South Cotabato.

Samtang si Dr. Lucio Tan usab, hugot nga nagpasalamat tungod sa pagdawat kaniya sa taga-Gensan ug gipasalig nga supurtahan ang pagpalambo sa mga negosyo dinhi sa dakbayan ug sa South Cotabato.

GENERAL SANTOS CITY – Usa ka patay’ng lawas ang nakaplagan sa Purok Malinawon, Brgy. Calumpang ning dakbayan kon asa ang biktima naka-angkon ug walo ka samad-tinigbasan ug dinunggaban.

Giila ang biktima nga si Tata Cutamora, taga-Purok Cahilsot Village, Brgy. Calumpang ning dakbayan.

Gibutyag nga kagabii, nagkig-inom pa ang biktima ngadto ni Marc Anthony Consuelo kauban ang mga higala, apan wala na masayod kung asa na kini miadto human makig-inom.

Nasayran na lamang ni Consuelo nga wala patay na si Cutamura sa dihang nakaplagan kining patay sa duol sa panimalay ni Jerry Ababo sa Purok Malinawon.

Sumala pa ni Ababo nga nakadungog kini kagabii ug kasaba nga pagpadagan sa motor ug pagkaugma gituktok kini sa mga nag-jogging ug gipahibalo kaniya nga adunay nagkulob nga tawo atubangan sa iyang balay.

Nakahiagom ug duha ka samad-tinigbasan sa ulo ang biktima, duha ka samad dinunggaban sa lawas, usa sa likod ug tiil ang biktima, gawas pa sa mga bun-og sa kamot ug likod nga bahin.

Sa inisyal nga imbestigasyon sa Tambler Police Station, posibleng gilabay lang ang patayng lawas sa biktima sa Purok Malinawon.

Hangtud karon, dili pa matumbok sa mga otoridad kung unsa ang motibo sa krimen ug kinsa ang suspek.

GENERAL SANTOS CITY – Naghikog ang usa ka batan-ong lalaki human matud pa nga gibulagan sa uyab.

Giila ang biktima nga si Clyde Katigdas, 17-anyos ug taga Purok- 17-A, 39.2, Brgy. Fatima dinhi sa Gensan.

Sumala pa ni Lorna Perez, iyaan sa biktima, natingala kini sa linihukan sa pag-umangkon nga kanunay ng magul-anon ug wala na ga-komedya kanila kagahapong adlawa.

Hilabihan na lamang ang ilang kahikurat nga kaganihang buntag, nakaplagan na lang si katigdas nga gabitay ibabaw sa kisame sa balay, gamit ang habol nga gihigot sa iyahang.

Gibutyag nga aduna pay lima ka sulat nga gibilin si Katigdas una naghikog. Ang maong mga sulat alang kaniya, sa pag-umangkon, apuhan, magtutudlo ug uyab.

Gatuo si Perez nga ang pagpakigbulag sa uyab niini ang hinungdan sa paghikog sa biktima tungod una ng nanganti ang biktima nga magpakamatay ugaling nga bulagan sa uyab.

Nasayran nga niadtong miaging Biyernes hilabihan matud pa ang paghilak ni Katigdas human nga gibulagan sa uyab.

Anaa na sa kapulisan ang sulat sa magtutudlo ug uyab nga gihimo sa biktima una kini mamatay.

GENERAL SANTOS CITY – Nag-public apology ang igsuon ni Sarangani Vice-Governor Steve Chiongbian Solon nga si Ken Solon sa pamilyang Pacquiao ug Jamora pinaagi sa Bombo Radyo sa gihimo matud pa niini nga pagmaoy sa JMEX resto bar sa magtiayong Pacquiao kaniadtong Pebrero 12 sa gabii.

Personal nga mianhi sa Bombo Radyo si Solon ug nangayo ug despensa sa gamay’ng kagubot nga gihimo niini.

Giangkon niini nga nasobrahan lang kini sa kahubog apan dili matud pa niini intensyon nga mangdaut sa negosyo ug pagkatawo sa mga Pacquiao, luyo nga wala na niini gikumpirma o gipanghimakak nga gisumbag ang hulagway ni Jinkee Pacquiao.

Buot matud pa niining ipaklaro nga dili niini kinaiya ang magmaoy kon mahubog ug wala matud pay kalabutan niini ang iyahang mga kabanay dungan sa pasalig nga dili na gayud masubli ang maong panghitabo.

Gikanayon usab ni Solon nga regular kining kostumer sa JMEX sa Dadiangas Heights tungod na-engganyo matud pa kini sa kaanindot sa maong dapit.

Matud pa niini, nangayo na kini ug pasaylo sa manager nga si lotlot Jamora, sa uyuan ni Jinkee nga si Fiscal Edilberto Jamora ug sa magtiayong Pacquiao.

GENERAL SANTOS CITY – Patay na nga nakaplagan ang usa ka Hapon sa lawak nga iyahang gitulugan kaganihang buntag.

Giila ang nahisgutan nga si Kaso Ogoshi, 57-anyos ug igo lamang nga mibisita dinhi sa Gensan.

Base sa imbestigasyon sa kapulisan, gikan matud pa sa Davao City si Ogoshi ug milahos lamang dinhi sa Gensan human nga gisugat matud pa sa iyahang chatmate nga si Jovelyn Visayas, 32-anyos ang pangidaron.

Didto usab matud pa kini midayon sa balay sa babaye sa Purok-12, Uhaw, Brgy. Fatima ning dakbayan.

Sa dihang gipukaw pagkabuntag, nasapwan na lamang kini sa iyang chatmate nga wala nay kinabuhi.

Gitumbok sa mga otoridad nga posibleng cardiac arrest ang hinungdan sa kamatayon sa nahisgutang Japanese national.

GENERAL SANTOS CITY – Gipangita pa karon ang duha ka piniriso nga naka-ikyas sa Pendatun Police Station, sentrong bahin sa General Santos City kaganihang alas-tres sa kaadlawon.

Nasayran sa Bombo Radyo Gensan nga ang piniriso pa sa sulod sa selda ang nagpahibalo sa naka-duty nga pulis nga naikyasan na sila.

Gibutyag nga ang pinirisong si Jerson Lumakang, mitawag sa desk officer nga PO1 Jubillee Golendez nga ang iyang duha ka mga kauban nga piniriso ang naka-eskapo na pinaagi sa paggabas sa kabelya sa selda.

Giila ang mga pugante nga sila si Adrian Lagpit Alay Taloy Lugpit, 30-anyos, taga-San Juan, SIlway, Dad. West ug adunay kasong paglapas sa RA-9165 kon illegal possession of dangerous drugs; ug si Jomer Taganato, taga-Bo. B’laan, Brgy. Labangal ning dakbayan ug adunay kasong pagsupak sa illegal possession of firearms kon RA 8294.

Bisan ug nagdumili sa pagpagawas ug pamahayag ang mga pulis sa Pendatun-PNP, apan nakumpirma sa Bombo Radyo Gensan ang kabahin sa pag-ikyas sa mga piniriso pinaagi sa report ngadto sa buhatan ni City PNP-Director Marcelo Pintac sa Camp Fermin G. Lira.

Buot matud pang ihilom sa mga pulis sa Pendatun-PNP ang nahisgutang pag-ikyas sa mga piniriso ug ang gihimong rason nga busy sila kaganihang sayo sa buntag tungod matud pa, aduna silay suspetsadong kawatan nga buot gukdon.