NORTH UPI MAGUINDANAO – Ulitawo naghikog patay human kini gibiyaan sa iyang uyab sa Central Mindanao.

Ang kapulisan nag-ila sa biktima nga mao si Romeo Hernani, 21-anyos ug molupyo sa Poblacion, Nuro Upi, Maguindanao Province.

Sumala sa taho gikan sa Maguindanao Police Provincial Office, nahibaluan nga banda alas 3:00 sa hapon, Pebrero 25, samtang nag-inum-inom ang biktima uban ang iyang mga barkada kilid sa pinuy-anan niini,sa diha nga medyo hubog na kini, nananghid nga mangihi, apan miabot nalang ang tunga sa oras ang wala na gyud kini mibalik, hinungdan nga gisuta kini sa iyang mga kauban ug gisulod sa kasilyas, dako ang ilang kakurat sa diha nga nagbitay na ang biktima, gamit ang pisi sa ilang binuhing kanding nga maoy gihikot sa iyang liog.

Dali-dali kining gitabang ug gidala sa Cotabato Regional And Medical Center, apan pipila ka oras ang milabay, gidiklara kini sa mga attending Physician nga hingkabsan sa iyang kinabuhi.

Gipamahayag ni Edwin Sailon, barkada sa biktima,nga bag-o naghikog ang biktima, gikatakda na unta kining magpakasal sa iyang uyab apan kalit lamang nahanaw ang dalaga og mi-uban sa laing lalake,gumikan sa sobrang kaguol, wala na maka-agwanta si Hernani sa iyang gibati, resulta nga nagpakamatay na lamang kini aron matibway ang tanan.

Matod ni Elina, mama sa biktima nga niadtong adlawa masulub-on kaayo ang ilang anak ug wala usab kini magpahibalo sa ilaha nga kini adunay problima ngadto sa iyang ka-relasyon.

Ang kapulisan ang padayong nag-imbestiga aron masuta, kong wala bay foul play sa kamatayon sa ulitawo. (Bombo Garry Fuerzas).

MAGUINDANAO – Patay ang usa ka empleyado sa lokal nga panggamhanan sa Rajah Buayan, Maguindanao Province, human kini gipusil sa mga armado.

Ang kapulisan nag-ila sa biktima nga si Dacullah Tarumpa, 41-anyos, minyo, clerk sa local registrar sa maong dapit.

Subay sa taho nga nahagdaw gikan sa Maguindanao Police Provincial Office, nahibaluan nga banda alas 4:40 sa hapon, Pebrero 18, samtang sakay ang biktima sa iyang Honda Wave gikan sa iyang buhatan, pauli sa bay niini, sa diha nga giatangan kini sa duha ka wala mailhing suspek ug gipusil gamit ang kalibre .45 nga pistola.

Patay on the spot si Tarumpa nga na-igo sa iyang ulo ug dughan samtang ang mga mamumuno ang dali nga mi-ipsot sakay sa XRM nga motorsiklo paingon sa wala matino nga direksyon.

Matod ni Limannah,asawa sa biktima nga bag-o gipatay ang iyang bana,aduna kini hulga nga nadawat gikan sa wala mailhing grupo nga siya patyon gumikan sa pagsuporta sa usa ka politiko.

Apan nagtuo kapulisan nga posibling personal nga atraso o silos sa posisyon ang motibo sa kremin, hinuon, padayong kining nag-imbestiga aron mailhan ug masikop ang mga suspetsado. (Bombo Garry Fuerzas)

MAGUINDANAO – Usa ka dakong klase sa bomba ang nakaplagan sa mga sibilyan sa Guindulungan, Maguindanao Province.

Base sa taho gikan sa 6th Infantry (Kampilan) Division Philippine Army, pinaagi kang Colonel Julieto Ando nga banda alas 8:20 sa buntag, Pebrero 1, nasiplatan sa mga molupyo sa Barangay Bagan, Guindulungan, ang gamay nga itom nga bag nga gibilin kilid sa kalsada, sa diha nga gi-abrihan kini dako ang ilang kakurat gumikan bomba ang sulod, gitaho gilayon kini sa kapulisan,hinungdan nga dali-dali nga nagresponde ang mga ginsakpan sa explosive ordnance disposal battalion sa Philippine Army ug gidepyos ang improvised explosive device nga hinimo sa bala sa 60mm mortar.

Matod ni 6th ID chief M/Gen. Alfredo Cayton nga posibling himuan kini sa mga miyembro sa Lawless Moro Islamic Liberation Front (MILF) Group ug target ang convoy sa mga sundalo nga mu-agi sa naasoy nga dapit.

Posibling gibilin usab kini sa mga suspek sa kahadlok nga madakpan sa gipahugot nga  nga seguridad nga gipatuman sa militar og kapulisan didto sa Central Mindanao.

Gipamahayag ni Abdullaziz Untong nga molupyo sa barangay Bagan, nga aduna siya’y nakit-an nga duha ka wala mailhing tawo nga sakay sa Honda wave nga motorsiklo nga maoy nagbilin sa IED.

Ang otoridad sa Guindulungan ang padayong nag-imbestiga aron mailhan ang mga suspetsado nga nagbilin sa bomba ug madakpan. (Bombo Garry Fuerzas)

MAGUINDANAO – Oonse ka miyembro sa lawless Moro Islamic Liberation Front (MILF) ang napatay og tulo ang na-angol sa subling panag-ingkwentro sa Central Mindanao.

Base sa taho gikan 6th Infantry (Kampilan) Division Philippine Army, pinaagi kang Colonel Julieto Ando, nasayran nga banda alas 9:40 sa buntag, Enero 18, gisulong sa mukabat usa ka gatus ka mga MILF  nga gipangulohan ni Kumander Talio sa 105th Base Command ang mga Army og Cafgu detachment sa barangay Dakipil, Sharief Aquak, Maguindanao Province, apan dali kining nabantayan sa puwersa sa kagamhanan, resulta sa grabeng sinukliay ug mga bala tali sa duha ka grupo gamit ang mga tag-as nga matang sa armas.

Gipamahayag ni 601st Brigade Commander Colonel Marlou Salazar nga gumikan sa kadaghan sa mga rebelde, miabag na ang Philippine Air Force gamit ang duha ka OB-10 Bronco plane ug duha ka MG-520 attack helicopters aron bombahan ang posisyon sa lawless MILF.

Gatusan na usab ka pamilya ang subling namakwet pabalik sa mga evacuation center sa kahadlok nga ma-ipit sa kagubot.

Miatras ang mga rebelde sa diha nga dili na niini ma-agkwanta ang gilusad nga air to ground assault sa kasundaluhan.

Narekober sa 11 nga napatay ang mga tag-as nga matang sa armas ug mga buhing bala, apan sa pamahayag ni MILF  Civil Military Relation Chief Eid Kabalu nga mas daghan ang napatay sa militar sa diha nga napalibutan kini sa ilang mga sakop sa utlanan nga parte sa Mamasapano ug Sharief Aquak, diin duha usab ka Simba armored carrier ang nabungkag sa diha nga na-igo kini sa rocket propelled grenade, nga hugtanon usab nga gipanghimakak sa 6th ID Phil. Army nga walay kamatuoran ang akusasyon sa MILF. (Bombo Garry Fuerzas)

MAGUINDANAO – Patay ang usa ka sundalo og usa ka sakop sa Civilian Armed Force Geographical Unit (CAFGU) human gibanggaan ang ilang gisakyan sa probinsiya sa Maguindanao.

Ang kapulisan nag-ila sa mga biktima nga sila PFC. Erickson Sandoval,miyembro sa 7th Infantry Battalion Philippine Army ug usa ka CAA Remie Morales.

Base sa taho gikan sa Traffic Division Unit sa Maguindanao Police Provincial Office,nasayran nga banda alas 2:20 sa hapon, Enero 15, sakay ang mga biktima sa XRM nga motorsiklo gikan sa  Headquarter sa 602nd Brigade Philippine Army sa Carmen, North Cotabato  paingon sa ilang kampo apan pag-abot niini sa barangay Pagagawan, Datu Montawal, Maguindanao Province, kalit kining gibanggaan sa naghagoros nga forward truck nga mi-overtake sa usa ka kotse.
 
Tungod sa kakusog sa impak sa aksidente,nalagpot ang gisakyan sa mga biktima ug mibangga pa kini sa balay kilid sa kalsada.
 
Patay on the spot ang sundalo ug Cafgu human nabuak ang ulo niini nga nabunal sa semento samtang ang drayber sa forward truck ang mipatoratoy lang sa pagpadagan sa iyang sakyanan paingon sa siyudad sa Kidapawan.
 
Matod ni Irman Basco, nga nakasaksi sa hitabo nga kusog kaayo ang dagan sa forward truck ug murag hubog ang drayber wala gyud kini mihunong aron tabangan ang mga biktima.
 
Ang kapulisan ang padayong nag-imbestiga aron mailhan ug madakpan ang nagmaniho sa forward truck.(BOMBO GARRY FUERZAS)

MAGUINDANAO PROVINCE – Upat ka mga miyembro sa lawless Moro Islamic Liberation Front (MILF) ang napatay og duha ang na-angol sa militar sa pinaka-ulahing panag-ingkwentro didto sa Central Mindanao.

Sigun sa taho gikan sa 6th Infantry (Kampilan) Division Philippine Army, pinaagi kang Col. Julieto Ando, nasayran nga banda alas 8:20 sa buntag, Enero 11, gisulong sa mukabat 30 ka MILF ubos sa 105th Base Command, nga gipangulohan ni Kumander Talio ang detachment sa 46th Infantry Battalion Philippine Army sa sitio Tatapan, Barangay Kitango, Datu Saudi Ampatuan, Maguindanao province, apan dali kining nabantayan sa puwersa sa gobyerno resulta sa 45 minutos nga sinukliay ug mga bala tali sa duha ka grupo gamit ang mga tag-as nga matang sa armas.
 
Gumikan sa kagubot gatusan ka mga sibilyan ang subling namakwet pabalik sa mga evacuation center sa kahadlok nga maipit sa panag-ingkwentro.
 
Miatras ang mga rebelde sa diha nga gi-bombahan ang ilang posisyon  sa kasunadaluhan gamit ang 105mm howitzers cannon.

Narekober sa mga napatay nga MILF ang duha ka M14 usa ka M79 grenade launchers, usa ka M16 armalite rifle ug mga buhing bala, samtang duha usab ang nasamdan sa mga sakop sa 46th Infantry Battalion Philippine Army nga naila nga sila SSgt. Ronald Comejo ug PFC Jessie Tejamo.
 
Gilusad na sa kasundaluhan ang manhunt operation batok sa lawless MILF og grupo ni Kumander Basit Usman sa diha nga gimando ni Pangulong Gloria Macapagal Arroyo nga pakusgon pa ang operasyon batok sa naasoy nga grupo nga gitumbok nga responsable sa katag-katag nga pagpamomba didto sa Central Mindanao. (Bombo Garry Fuerzas)