TACURONG CITY – Patay ang usa ka barangay chairman human kini gipusil sa Tacurong City.

Ang kapulisan nag-ila sa biktima nga mao si Rudy Macalbog, 44- anyos, minyo, barangay kapitan, sa Barangay Pedtigian, Salipada K. Pindatun, Maguindanao Province.

Sigun sa taho gikan sa Sultan Kudarat Police Provincial Office, nasayran nga banda alas 10:30 sa buntag, Pebrero 25, samtang naglakaw ang biktima sa barangay New Isabela aron mubisita sa iyang paryente, sa diha nga gisugat kini sa duha ka wala mailhing suspek ug gipusil gamit ang kalibre .45 nga pistola.

Patay on the spot si Macalbog sa diha nga na-igo kini sa iyang dughan ug ulo, samtang ang mga mamumuno ang dali nga mi-iskapo sakay sa XRM nga motorsiklo paingon sa wala matino nga direksyon.

Matod ni Esmael Guiaman, ig-agaw sa biktima nga kalit kaayo ang hitabo ug wala sila makabantay sa pag-abot sa mga suspek,hinuon ilang nakuha ang plaka sa motorsiklo.

Nagtuo si Tacurong City Police Director Supt. Joel Limzon nga posibling politika o reedo ang motibo sa pagpatay sa naasoy nga barangay opisyal.

Ang kapulisan ang padayong nag-imbestiga aron mailhan ug madakpan ang mga suspetsado. (Bombo Garry Fuerzas)