BACOLOD CITY – Biktima sang pagpang-abuso sexual ang amazona nga napatay sa engkuwentro sa Cadiz City, Negros Occidental sadtong Domingo rason nga ini ang nagsulod sa hublag sang rebeldeng New People’s Army.

Ini ang ginpahayag sang iloy mismo sang napatay nga si Rotchel Hilado, 19-anyos sang Hunob-Hunob, Escalante City, Negros Occidental matapos na identify ang bata.

Suno sa iloy nga si Ninfa Hilado, naglisensiya gid lamang si Rotchel sadtong nagligad nga tuig nga magapangita sang trabaho sa ciudad sang Bacolod matapos naka-gradwar sa high school apang wala na makapauli.

Ulihi lang sini nahibaluan gikan sa mga kaabyanan sang anak nga ini ang ginhimuslan sang iya kaugalingon nga amay rason nga nagbiya sa ila balay.

Iya ginpadulungan ang bangkay sa Cadiz City matapos nakabaton sang impormasyon nga may kaanggid kay Rotchel ang bangkay sang amazona nga napatay sa encounter.

Sang gintan-aw ang bangkay, positibo sini nga ginkilala ang anak.

BACOLOD CITY – Dugang nga mga suldado kag K9 units ang nagabulig sa 62nd Infantry Battalion sa paglagas sa mga rebeldeng New People’s Army nga ila naka-engkuwentro sadtong Domingo sa Sitio Aluyan, Brgy. Caduhaan, Cadiz City.

Ang engkuwentro sa tunga sang mga suldado sang 62nd IB kag kapin 30 ka mga rebelde nga ginapatihan miembro sang Larangan Northern Negros (KLNN) ang nagresulta sa kamatayon sang isa ka opisyal sang army kag anom ka mga rebelde.

Suno kay Col. Maximo Caro, 303rd Infantry Brigade commander, ang grupo sang mga rebelde ang ginapamunuan ni Ramon Amaca, bana ni Charity Amaca nga amo ang deputy secretary sang KLNN nga responsable sa mga kalakasan sa Northern Negros.

Samtang, padayon man nga gina-verify sang mga suldado ang report sang mga civilian nga ila nakita nga duha pa ka mga rebelde ang patay sa amo nga engkuwentro nga gindala palagyo sang ila mga kaupdanan.

Sa karon, duha pa lang sa anom ka mga rebelde nga nagkalamatay ang ila nakilala nga ginalakipan nanday Rotchel Hilado, 19 anyos sang Hunob-Hunob, Escalante City kag Jovanie Romano, 37 anyos sang San Pablo, Manapla .

Si Hilado ang ginkilala sang iya iloy nga si Ninfa samtang si Romano ang ginkilala naman sang ila Brgy. Kapitan nga si Benjie Cabayao.

Samtang ang opisyal sang militar nga si 1Lt. Archie Polenzo ang yara sa isa ka puneraria sa Bacolod City kag nakatalana naman nga ipadala sa ila lugar sa Pagadian City.

BACOLOD CITY – Nagsaka na sa P11,487,120 ang kahalitan nga gintuga sang El Niño Phenomenon sa Negros Occidental sa pananom kag kasapatan.

Base sa report sang Provincial Agriculture’s Office ang kahalitan sa pananom nalab-ot na sa P9,114,040.

Naglab-ot na sa 10 ka banwa kag tatlo ka mga ciudad sa probinsya ang apektado matapos nagkalalaya ang ila tanom nga humay, mais kag mongo.

Kalakip sa mga lugar nga naapektuhan amo ang Murcia, Himamaylan City, Cauayan, La Castellana, Ilog, Hinoba-an, Kabankalan City, Hinigaran, Calatrava, Binalbagan, Sipalay City, Ilog, kag Isabela.

Samtang, sa report sang Provincial Veterinary Office naglab-ot naman sa P2,373,080 ang kahalitan sa bahin sang kasapatan.

Madamo na mga kasapatan ang nagkalamatay tuga sang tuman nga kainit sang panahon nga ginalakipan sang karabaw, baka, kanding, baboy, manok, pato, kag mangin ang mga inugbulang nga manok sa pito ka ciudad kag 12 ka kabanwahanan

Ini ang ginalakipan sang Cadiz City, Victorias City, Bago City, Moises Padilla, Binalbagan, Himamaylan City, Kabankalan City, Ilog, Hinoba-an, Murcia, La Castellana, EB Magalona, Manapla, Toboso, Calatrava, San Carlos City, Silay City, Hinigaran kag Candoni.

Samtang, sa bug-os nga Western Visayas, naglab-ot na sa P761.2 million ang balor sang humay nga nahalitan sang El Niño kag naglab-ot naman sa 43,187 ka mangunguma ang apektado.

BACOLOD CITY – Patay ang isa ka pastor nga nabungguan sang truck samtang naga-bike sa banwa sang Pontevedra, Negros Occidental kaina sang aga.

Ang biktima amo si, Jojie Gallego, 50-anyos sang San Enrique, Negros Occidental nga dead on the spot matapos nawasak ang ulo sang nalapakan sang goma sang salakyan.

Suno kay C/Inps. Argel Ancheta, hepe sang Pontevedra Police Station, natabo ang aksidente alas 6:05 kaina sang aga sa highway sang Brgy. San Juan, Pontevedra samtang nagasunod ang truck sa bike sang biktima.

Ginpahayag nga nagtabog ang biktima sa ginasakyan nga bike kag nalapakan pa sang salakyan ang iya ulo rason sang iya gilayon nga kamatayon.

Detain naman ang driver sang truck nga si Joel Alegre sang Bonifacio, Sagay City matapos nagsurrender.

Gikan sa Sagay City ang truck karga ang inugdeliver nga quick lime sa sugar central sa Kabankalan City sang natabo ang aksidente.

BACOLOD CITY – Ginareklamo ang National Federation of Sugar Planters (NFSP) sa probinsya sang Negros Occidental ang indi mapaathag nga pagnubo sa pressyo sang kalamay.

Suno kay Mr. Enrique Rojas, presidente sang NFSP maka-alarma ang pagnubo sa presyo sang kalamay apisar sang bastante nga domestic supply sang kalamay.

Nagaduda ang mga ini nga may iban nga sector nga nagmanipulate sa presyo agod makabintaha apang sa kagastuhanan sang mga sugar producers.

Angot sini ginaduso sang NFSP sa Sugar Regulatory Administration (SRA) nga magpakig-angot sa Department of Trade and Industry agod tan-awon ang posibilidad sang manipulation sa presyo sang kalamay agod maprotehiran ang mga producers.

Ginahinyo man sang NFSP sa SRA nga mag pakig-angot sa Land Bank of the Philippines agod mabuligan ilabi na sa mga small planters, agod ila temporaryo nga ma hold ang ila nga quedans kag mapanginpuslan ang maayo nga presyuhanay sa pagtakop sang milling season.

Samtang, una na nga ginpahayag sang SRA nga indi kontrolado sang gobierno ang pagnubo sa presyo, matapos nga nagnubo ang presyo sang kalamay sa world market.

BACOLOD CITY – Nagpatigayon sang rally ang mga taga-supporta ni Luis Mondia, ang anay alkalde sang Pulupandan, Negros Occidental nga ginpatay sa Iloilo City.

Ginatos nga mga supporters ang nag-upod sa rally nga nagsugod alas 2:00 sang hapon gikan sa banwa Pulupandan padulong sa Bishop’s house sa ciudad sang Bacolod sa diin ginpatigayon ang prayer rally.

Katuyuan sang lihok amo ang pagpanawagan para sa madasig nga hustisya kay Mondia nga ginluthang sa Jaro, Iloilo City kag politika ang ginatudlo nga motibo.

Nahibaluan nga biktima ang kandidato sa pagka-alkalde sa Pulupandan batok sa incumbent nga alkalde nga si Magdaleno “Magsy” Peña.

Sa subong wala pa sang nadakpan nga suspetsado ang kapulisan apisar sang ila pahayag nga natumod na ang responsable sa krimen.

Si Mondia ang nakatalana nga igalubong sa adlaw sang Domingo, Febrero 28, 2010 sa Sanctuario de Bacolod matapos nadesisyunan sang pamilya nga indi na pagdal-on pa sa ila bawa sa Pulupandan agod makalikaw sa gamo bangod sa political tension.

BACOLOD CITY – Nagapangulihi sa survey ang duha ka mga anay appointed officials sang Arroyo administration nga nagkandidato sa Bacolod City.

Ini amo sanday Dr. Anthony Golez, ang ang anay deputy presidential spokesperson kag Ricardo Tan, ang anay head sang Land Transportation Office-National Capital Region nga nagpadalagan sa pagka-congressman.

Sa survey nga ginpatigayon sadtong Febrero 11-12, 2010 sang Random Access Consultants, Inc., nagapanguna ang anay konsehal nga si Renecito Novero nga may 26.8 percent sang boto sang mga respondents sa anom ka mga kandidato.

Nagapangaduha naman ang anay congressman nga si John Orola nga nakakuha sang 17.0%.

Nagtupa sa ika-tatlo nga puwesto si Golez nga may 15.3 %, samtang si Tan ang nakakuha naman sang 14.3% nga yara sa ika-apat nga puwesto, incumbent councilor Jocelle Batapa-Sigue nga may 12.1%, kag Ramon Vicky Fernandez nga may 1.3%.

Samtang, naglab-ot pa sa 13.3% ang undecided.

Ang survey ang may margin of error nga ± 4% (plus/minus).

BACOLOD CITY – Naglab-ot na sa duha ka trucks ang mga posters ng ginpangkakas sang Commission on Elections (Comelec) sa Bacolod City nga wala sa designated common poster area.

Ini sa duha pa lamang ka operasyon sang Comelec sang nagsugod ang campaign period sa national positions kag mga party-list groups sadtong Febrero 9.

Suno kay Atty. Ryan Castro, election officer sang Bacolod City, indi sila mag-untat sa pagpangkakas sang mga campaign posters sang mga kandidato kag wala man sang pagapasensiyahon kon may yara sang madakpan nga nagapang-tapik sini sa indi designated areas.

Samtang, aminado ini nga indi sa gihapon maapektuhan ang mga kandidato nga tag-iya sang posters bangod indi man ang mga ini ang direkta nga nagapang-tapik kundi ang ila lamang mga supporters.

Sa gihapon, padayon ang pagpahanumdom ni Atty. Castro sa mga kandidato kag mga taga-suporta sini nga sundon ang guidelines sang Comelec sa pagpangampanya.

Labi pa nga maga-bantay ang Comelec kag pasanyugon ang operasyon sa pagsugod sang campaign period sang mga nagapadalagan sa lokal nga posisyon sa Marso 26, sa diin ginapaa-bot ang pagdata pa gid pagpang-tapik sang mga posters sang kandidato sa indi common poster areas.

BACOLOD CITY -Igapaidalom sa refesher course ang 30 ka imbestigador sang Bacolod City Police Office (BCPO)ukon personnel sang Intelligence, Investigation and Detective Management Section (IDMS).

Ini ang ginpahayag ni BCPO director, S/Supt. Celestino Guara Jr., agod mapasanyog ang ikasarang sang mga imbestigador para sa proper procedure sa imbestigasyon sang kaso kag proper preservation of crime.

Ang lihok kasunod sang kapaltahan sang mga imbestigador nga nagresponder sa nahulog nga Pajero sa pier sang Bacolod nga ginkamatay sang duha ka mga sakay sini.

Sa amo nga insidente, napaslawan ang mga imbestigaor nga masunod ang husto nga paagi sa imbestigasyon bangod apisar basic nga pagpahamtang sang police line kag pagdocumento sa krimen paagi sa pagkuha sang litrato sa tanan nga anggulo sang hitabo ang wala mahimo.

Apat ka mga imbestigador sa amo nga insidente ang ginapaidalom sa imbestigasyon sa karon sang City Internal Affairs Service (CIAS) kag posible pasakaan sang kaso administratibo nga misfeasance of duty.

Ang refresher course ang pangunahan sang mga experto gikan sa Police Regional Office 6 sa Campo Delgado, Iloilo City.