BACOLOD CITY – Kasubong man niya nga Chinese amo ang ginatudlo nga nagpa-abduct sa negosyante nga si Jordan Chua sang Bacolod City.
Ini ang nagaguwa nga impormasyon gikan sa mga source sang Bombo Radyo Bacolod nga indi magpahinambit sang ngalan matapos nahilway ang biktima.
Ginpahayag nga may dako nga utang ang ginikanan ni Jordan sa utok sang krimen kag ang pag-abduct sa biktima ang paagi agod mabayaran ang utang.
Sa karon indi pa gid matul-id kon paano nahilway ang biktima sa Cebu kahapon.
Una nga ginpahayag nga ini ang nakapalagyo sa kamot sang iya mga abductors alas 2:00 sang kaagahon kag na rescue sang Police Anti-Crime Emergency Response okon PACER alas 10:00 sang aga nga amo ang nagdala sa talatapan sang PNP headquarters sa Camp Crame, Quezon City.
Suno naman sa kumpirmasyon ni Maj. Mercy Artillo, chief sang operation sang Camp Crame, may report na nakalab-ot sa ila gikan sa isa ka General apang indi mahatag ang detalye sang operasyon.
Suno naman sa isa ka opisyal sang Police Regional Office 7(PRO7), ginbuy-an si nga wala sang pay-off nga natabo.
Buwas, nakatalana nga magpaguwa sang official statement ang PRO7 kaangot sa paghilway kay Chua.
Si Jordan Chua, 26 anyos sang Sta. Clara Subdivision, Mandalagan, Bacolod City ang gin-abduct sadtong Marso 5, 2010 sa Dulao, Bago City, Negros Occidental sang apat ka mga suspek nga naka-bonnet kag sakay sa duag silver-grey nga Toyota Grandia.
Siya ang tag-iya sang Jordan Fishing sa Zamboanga City nga naga-supply sang sang mga isda sa isa ka dako nga kompaniya sang sardinas sa pungsod.
Ini man ang vice-president sang Southern Philippines, Deep Sea Fishing Inc. sa amo nga ciudad.
BACOLOD CITY – Matapos ang lima ka adlaw nga pagpabilin sa kamot sang iya mga abductors, nahilway na gid man ang negosyante nga si Jordan Chua nga gin-abduct sadtong Marso 5, 2010 sa Brgy. Dulao, Bago City, Negros Occidental.
Suno sa source sang Bombo Rdayo Bacolod, si Chua ang na release alas 10:00 kahapon sang aga sa Cebu.
Ginpahayag nga ini ang nakapalagyo gikan sa mga abductors kag na rescue sang wala pa matumod nga unit ukon grupo.
Sa karon, ginpahayag nga ini ang yara na sa talatapan sang Campo Crame.
Suno naman kay Major Mercy Artillo, sang operation branch sang Campo Crame, nakalab-ot na sa ila ang report kaangot sa pag rescue kay Chua apang indi pa makahatag sang tul-id na nga detalye kon paano ginpatigayon ang operation.
Madumduman nga si Chua ang gin-abduct samtang naga bike sa Bago City sang apat ka mga suspetsado nga sakay sa Silver-Grey nga Toyota Grandia.
Ang salakyan ang nasiplatan sadtong Lunes sa Dumaguete City, Negros Oriental.
Si Chua, 26-anyos ang tag -iya sang Jordan Fishing sa Zamboanga City nga nagsu-suplay sang mga isda sa dako nga kopmpaniya sang sardinas sa pungsod.
Ini man ang vice president sang Southern Philippines, Deep Sea Fishing, Inc. sa nasambit nga ciudad.
BACOLOD CITY – Biktima sang pagpang-abuso sexual ang amazona nga napatay sa engkuwentro sa Cadiz City, Negros Occidental sadtong Domingo rason nga ini ang nagsulod sa hublag sang rebeldeng New People’s Army.
Ini ang ginpahayag sang iloy mismo sang napatay nga si Rotchel Hilado, 19-anyos sang Hunob-Hunob, Escalante City, Negros Occidental matapos na identify ang bata.
Suno sa iloy nga si Ninfa Hilado, naglisensiya gid lamang si Rotchel sadtong nagligad nga tuig nga magapangita sang trabaho sa ciudad sang Bacolod matapos naka-gradwar sa high school apang wala na makapauli.
Ulihi lang sini nahibaluan gikan sa mga kaabyanan sang anak nga ini ang ginhimuslan sang iya kaugalingon nga amay rason nga nagbiya sa ila balay.
Iya ginpadulungan ang bangkay sa Cadiz City matapos nakabaton sang impormasyon nga may kaanggid kay Rotchel ang bangkay sang amazona nga napatay sa encounter.
Sang gintan-aw ang bangkay, positibo sini nga ginkilala ang anak.
ILOILO CITY – Mahimu magsaka ang numero sang drug groups sa Western Visayas sunu kay Philippine Drug Enforcement Agency (PDEA) Region 6 Director Paul Ledesma.
Sa interview sang Bombo Radyo Iloilo, ginpahayag ni Ledesma nga gikan sa lima ka grupo sang sindikato sang iligal nga druga sa rehiyon, mahimu magsaka ini sa walo base man sa pinakaulihi nga impormasyon nga ila nabaton gikan sa ila national office.
Sa interview sang Bombo Radyo Iloilo kay Ledesma, may panibag-o nga grupo sang drug lords nga namonitor ang ila ahensya sa probinsya sang Aklan ilabi na sa isla sang Boracay, probinsya sang Capiz, kag Antique.
Una diri, gintumod sang PDEA ang presensya sang lima ka drug groups sa Rehiyon 6 kun sa diin duha diri ang yara sa Iloilo City, isa sa Bacolod City, isa sa
BACOLOD CITY – Yara na sa talatapan sang Comelec Provincial Office ang 60 ka mga Precinct Count Optical Scan (PCOS) machines para sa Negros Occidental.
Ini ang ginkumpirmar ni Comelec Provincial Supervisor Atty. Jessie Suarez.
Ang PCOS machines amo ang gamiton sa automated election sa Mayo 10, 2010.
Ginpa-athag ni Atty. Suarez, ang 60 ka mga PCOS nga nag-abot ang gamiton sa training sang 4,100 nga mga Board of Election Inspectors (BEI’s) sa Negros Occidental sini nga bulan.
Dugang pa nga 30 ka mga PCOS machines ang ginalauman nga iga deliver sini nga semana.
Ang Negros Occidental ang may yara sang 2,050 clustered precincts nga dapat may yara sang PCOS machines kada isa sa tion sang election.
May yara man sang reserve PCOS machines nga ihatag sa probinsya kon may yara sang may ma-abirya nga makina
BACOLOD CITY – Nagsaka na sa P11,487,120 ang kahalitan nga gintuga sang El Niño Phenomenon sa Negros Occidental sa pananom kag kasapatan.
Base sa report sang Provincial Agriculture’s Office ang kahalitan sa pananom nalab-ot na sa P9,114,040.
Naglab-ot na sa 10 ka banwa kag tatlo ka mga ciudad sa probinsya ang apektado matapos nagkalalaya ang ila tanom nga humay, mais kag mongo.
Kalakip sa mga lugar nga naapektuhan amo ang Murcia, Himamaylan City, Cauayan, La Castellana, Ilog, Hinoba-an, Kabankalan City, Hinigaran, Calatrava, Binalbagan, Sipalay City, Ilog, kag Isabela.
Samtang, sa report sang Provincial Veterinary Office naglab-ot naman sa P2,373,080 ang kahalitan sa bahin sang kasapatan.
Madamo na mga kasapatan ang nagkalamatay tuga sang tuman nga kainit sang panahon nga ginalakipan sang karabaw, baka, kanding, baboy, manok, pato, kag mangin ang mga inugbulang nga manok sa pito ka ciudad kag 12 ka kabanwahanan
Ini ang ginalakipan sang Cadiz City, Victorias City, Bago City, Moises Padilla, Binalbagan, Himamaylan City, Kabankalan City, Ilog, Hinoba-an, Murcia, La Castellana, EB Magalona, Manapla, Toboso, Calatrava, San Carlos City, Silay City, Hinigaran kag Candoni.
Samtang, sa bug-os nga Western Visayas, naglab-ot na sa P761.2 million ang balor sang humay nga nahalitan sang El Niño kag naglab-ot naman sa 43,187 ka mangunguma ang apektado.
BACOLOD CITY – Ginareklamo ang National Federation of Sugar Planters (NFSP) sa probinsya sang Negros Occidental ang indi mapaathag nga pagnubo sa pressyo sang kalamay.
Suno kay Mr. Enrique Rojas, presidente sang NFSP maka-alarma ang pagnubo sa presyo sang kalamay apisar sang bastante nga domestic supply sang kalamay.
Nagaduda ang mga ini nga may iban nga sector nga nagmanipulate sa presyo agod makabintaha apang sa kagastuhanan sang mga sugar producers.
Angot sini ginaduso sang NFSP sa Sugar Regulatory Administration (SRA) nga magpakig-angot sa Department of Trade and Industry agod tan-awon ang posibilidad sang manipulation sa presyo sang kalamay agod maprotehiran ang mga producers.
Ginahinyo man sang NFSP sa SRA nga mag pakig-angot sa Land Bank of the Philippines agod mabuligan ilabi na sa mga small planters, agod ila temporaryo nga ma hold ang ila nga quedans kag mapanginpuslan ang maayo nga presyuhanay sa pagtakop sang milling season.
Samtang, una na nga ginpahayag sang SRA nga indi kontrolado sang gobierno ang pagnubo sa presyo, matapos nga nagnubo ang presyo sang kalamay sa world market.
BACOLOD CITY – Nagpatigayon sang rally ang mga taga-supporta ni Luis Mondia, ang anay alkalde sang Pulupandan, Negros Occidental nga ginpatay sa Iloilo City.
Ginatos nga mga supporters ang nag-upod sa rally nga nagsugod alas 2:00 sang hapon gikan sa banwa Pulupandan padulong sa Bishop’s house sa ciudad sang Bacolod sa diin ginpatigayon ang prayer rally.
Katuyuan sang lihok amo ang pagpanawagan para sa madasig nga hustisya kay Mondia nga ginluthang sa Jaro, Iloilo City kag politika ang ginatudlo nga motibo.
Nahibaluan nga biktima ang kandidato sa pagka-alkalde sa Pulupandan batok sa incumbent nga alkalde nga si Magdaleno “Magsy” Peña.
Sa subong wala pa sang nadakpan nga suspetsado ang kapulisan apisar sang ila pahayag nga natumod na ang responsable sa krimen.
Si Mondia ang nakatalana nga igalubong sa adlaw sang Domingo, Febrero 28, 2010 sa Sanctuario de Bacolod matapos nadesisyunan sang pamilya nga indi na pagdal-on pa sa ila bawa sa Pulupandan agod makalikaw sa gamo bangod sa political tension.
BACOLOD CITY – Nagapangulihi sa survey ang duha ka mga anay appointed officials sang Arroyo administration nga nagkandidato sa Bacolod City.
Ini amo sanday Dr. Anthony Golez, ang ang anay deputy presidential spokesperson kag Ricardo Tan, ang anay head sang Land Transportation Office-National Capital Region nga nagpadalagan sa pagka-congressman.
Sa survey nga ginpatigayon sadtong Febrero 11-12, 2010 sang Random Access Consultants, Inc., nagapanguna ang anay konsehal nga si Renecito Novero nga may 26.8 percent sang boto sang mga respondents sa anom ka mga kandidato.
Nagapangaduha naman ang anay congressman nga si John Orola nga nakakuha sang 17.0%.
Nagtupa sa ika-tatlo nga puwesto si Golez nga may 15.3 %, samtang si Tan ang nakakuha naman sang 14.3% nga yara sa ika-apat nga puwesto, incumbent councilor Jocelle Batapa-Sigue nga may 12.1%, kag Ramon Vicky Fernandez nga may 1.3%.
Samtang, naglab-ot pa sa 13.3% ang undecided.
Ang survey ang may margin of error nga ± 4% (plus/minus).
BACOLOD CITY – Naglab-ot na sa duha ka trucks ang mga posters ng ginpangkakas sang Commission on Elections (Comelec) sa Bacolod City nga wala sa designated common poster area.
Ini sa duha pa lamang ka operasyon sang Comelec sang nagsugod ang campaign period sa national positions kag mga party-list groups sadtong Febrero 9.
Suno kay Atty. Ryan Castro, election officer sang Bacolod City, indi sila mag-untat sa pagpangkakas sang mga campaign posters sang mga kandidato kag wala man sang pagapasensiyahon kon may yara sang madakpan nga nagapang-tapik sini sa indi designated areas.
Samtang, aminado ini nga indi sa gihapon maapektuhan ang mga kandidato nga tag-iya sang posters bangod indi man ang mga ini ang direkta nga nagapang-tapik kundi ang ila lamang mga supporters.
Sa gihapon, padayon ang pagpahanumdom ni Atty. Castro sa mga kandidato kag mga taga-suporta sini nga sundon ang guidelines sang Comelec sa pagpangampanya.
Labi pa nga maga-bantay ang Comelec kag pasanyugon ang operasyon sa pagsugod sang campaign period sang mga nagapadalagan sa lokal nga posisyon sa Marso 26, sa diin ginapaa-bot ang pagdata pa gid pagpang-tapik sang mga posters sang kandidato sa indi common poster areas.
Recent Comments