KORONADAL CITY – Triple ang ginubo sang kaso sang paggamit sang iligal nga druga sa probinsiya sang South Cotabato, suno sa Provincial Anti-Drug Abuse Council ukon PADAC.

Ginpahayag sa BomboRadyo Koronadal ni Eduardo Siason, ang permanent representative ni South Cotabato Gov. Daisy Avance Fuentes sa PADAC, nga nagnubo ang kaso sang paggamit sang iligal nga druga sa probinsiya kasunod sa paghuyang sang produksiyon sini bangud sa mga ginapatigayon nga raid sang mga otoridad.

Suno kay Siason, naglab-ot sa 61 ka mga madinalag-on nga raid ang ginpatigayon sang Philippine Drug Enforcement Agency ukon PDEA, NBI kag PNP sa probinsiya base sa ila nga datus sa nakaligad nga bulan sang Oktubre.

Nahibaluan nga ginahatagan sa subong sang provincial government sang reward ang mga kapulisan sa tagsa ka madinalag-on nga raid nga ginapatigayon batuk sa iligal nga druga.

Samtang, naglab-ot naman sa 60 ka mga punuan sang marijuana ang ginsunog sang PADAC nga nakumpiskar sa mga banwa sang Tampakan kag Lake Sebu kadungan sa ginpatigayon nga culmination sang Drug Prevention and Control Week sa nakaligad nga semana.

KORONADAL CITY- Wala sang kandidato nga nagplastar sang ila nga Certificate of Candidacy ukon COC sa Commission on Election ukon Comelec sa siyudad sang Koronadal.

Ini ang ginkumpirmar sa BomboRadyo Koronadal ni City Comelec Evangeline Basan kadungan sa pormal nga pagsugod sang filing of COC sang mga pulitiko nga magapapili sa 2010 sa subong nga adlaw.

Apang, ginpaathag ni Basan nga may mga pulitiko na nga nagkuha sang certification sa ila nga talatapan nga ginalauman nga ila nga iga-file sa madason nga mga inadlaw.

Samtang, padayon naman ang pagpatigayon sang “cleaning” sang ahensiya sa ila nga listahan sa mga registered voters.

Suno kay Basan, katuyuan sini nga malikawan ang duplication sang mga pangalan sa palaabuton nga eleksiyon.

KORONADAL CITY- Ginahibalu na sa subong sang pamunuan sang WG&A-Superferry ang report nga yara sa Metro Manila ang 11-months old nga si Baby Arlene.

Ginpahayag sa BomboRadyo Koronadal ni Jess Supan, Vice President for Safety and Security sang WG&A-Superferry, nga ginahibalo na sa subong sang WG&A sa Manila ang nabaton nga reports nga nakita na ang nasambit nga lapsag.

Samtang, ginpahayag naman sang pamilya Gaso sa Purok Masagana, Koronadal City nga may nabaton man sila nga report nga yara sa Metro Manila si Baby Arlene apang wala pa nila ini nakumpirmar.

Madumduman nga nagbuliganay na ang Philippine Coast Guard, Philippine Navy, DSWD kag WG&A sa pagpangita sa nasambit nga lapsag.

Una diri, ginpahayag naman sang iloy sang lapsag nga si Marlyn nga nagapabilin sa subong sa isa ka hotel sa Zambonga nga indi ini magabiya tubtob nga wala nakit-an ang iya nga bata.