BACOLOD CITY – Ginsuguran na sang kapulisan sa Western Visayas ang “Oplan Semana Santa” agod maghatag sang seguridad sa mga deboto, motorista kag mga turista.
Ini kasunod ang mando nga ginpaguwa ni Police Regional Office (PRO) 6 director C/Supt. Isagani Cuevas.
Kabahin sa pagpatuman sang “Oplan Semana Santa” ang pagdeploy sang PNP personnel sang provincial kag station level sa mga dalanon padulong sa sites sang religious activities kag mga summer resorts.
Ginpaathag ni Cuevas, lauman na ang pagdagsa sang madamo nga tawo gikan sa nagkalain-lain nga lugar sa mga simbahan, summer resorts kag tourist spots sa rehiyon, nga dapat mapasiguro ang ila seguridad.
Ginmando man sini sa mga field unit commanders nga magpakig-angot sa mga organizers sang mga simbahan kag iban nga ahensiya sang gobierno agod mapasiguro ang maayo nga serbisyo sa tion sang semana santa nga magasugod sa Marso 29 tubtub Abril 4.
Samtang, ginpanugyanan sini ang publiko nga mangin responsable man sa ila kaugalingon.
Suno kay Cuevas, indi magdala sang malahalon nga kagamitan, alahas kag dako nga kuarta kon maglagaw agod indi mabiktima sang kawatan lakip man ang pagsiguro sang kaluwasan sang ila panimalay kon sila ang magbiya agod magtambong sa mga religious activities kag iban pa nga aktibidad sini nga summer
BACOLOD CITY – Dugang nga mga suldado kag K9 units ang nagabulig sa 62nd Infantry Battalion sa paglagas sa mga rebeldeng New People’s Army nga ila naka-engkuwentro sadtong Domingo sa Sitio Aluyan, Brgy. Caduhaan, Cadiz City.
Ang engkuwentro sa tunga sang mga suldado sang 62nd IB kag kapin 30 ka mga rebelde nga ginapatihan miembro sang Larangan Northern Negros (KLNN) ang nagresulta sa kamatayon sang isa ka opisyal sang army kag anom ka mga rebelde.
Suno kay Col. Maximo Caro, 303rd Infantry Brigade commander, ang grupo sang mga rebelde ang ginapamunuan ni Ramon Amaca, bana ni Charity Amaca nga amo ang deputy secretary sang KLNN nga responsable sa mga kalakasan sa Northern Negros.
Samtang, padayon man nga gina-verify sang mga suldado ang report sang mga civilian nga ila nakita nga duha pa ka mga rebelde ang patay sa amo nga engkuwentro nga gindala palagyo sang ila mga kaupdanan.
Sa karon, duha pa lang sa anom ka mga rebelde nga nagkalamatay ang ila nakilala nga ginalakipan nanday Rotchel Hilado, 19 anyos sang Hunob-Hunob, Escalante City kag Jovanie Romano, 37 anyos sang San Pablo, Manapla .
Si Hilado ang ginkilala sang iya iloy nga si Ninfa samtang si Romano ang ginkilala naman sang ila Brgy. Kapitan nga si Benjie Cabayao.
Samtang ang opisyal sang militar nga si 1Lt. Archie Polenzo ang yara sa isa ka puneraria sa Bacolod City kag nakatalana naman nga ipadala sa ila lugar sa Pagadian City.
ILOILO CITY – Mahimu magsaka ang numero sang drug groups sa Western Visayas sunu kay Philippine Drug Enforcement Agency (PDEA) Region 6 Director Paul Ledesma.
Sa interview sang Bombo Radyo Iloilo, ginpahayag ni Ledesma nga gikan sa lima ka grupo sang sindikato sang iligal nga druga sa rehiyon, mahimu magsaka ini sa walo base man sa pinakaulihi nga impormasyon nga ila nabaton gikan sa ila national office.
Sa interview sang Bombo Radyo Iloilo kay Ledesma, may panibag-o nga grupo sang drug lords nga namonitor ang ila ahensya sa probinsya sang Aklan ilabi na sa isla sang Boracay, probinsya sang Capiz, kag Antique.
Una diri, gintumod sang PDEA ang presensya sang lima ka drug groups sa Rehiyon 6 kun sa diin duha diri ang yara sa Iloilo City, isa sa Bacolod City, isa sa
ILOILO CITY – Makaalarma na ang pagsaka sang kaso sang sexual abuse sa Rehiyon 6 santu sa pinakaulihi nga impormasyon nga nakuha sang Bombo Radyo Iloilo sa Department of Social Welfare and Development (DSWD).
Nahibaluan nga sang nakaligad nga semana walo na ka kaso sang sexual abuse ang nabaton sang ahensya.
Sa subong may yara sang 32 ka mga biktima sang sexual nga pagpang-abuso ang yara sa pag-inakop sang DSWD sa ila Center Home for Girls sa idalum ni Judith Tanyate.
Ang mas makalaarma pa sunu sa DSWD amu nga kalabanan sa mga biktima sang sexual nga pagpang-abuso naghalin sa imul nga pamilya kag ginabiktima sang ila man lang malapit nga himata.
BACOLOD CITY – Nagpatigayon sang rally ang mga taga-supporta ni Luis Mondia, ang anay alkalde sang Pulupandan, Negros Occidental nga ginpatay sa Iloilo City.
Ginatos nga mga supporters ang nag-upod sa rally nga nagsugod alas 2:00 sang hapon gikan sa banwa Pulupandan padulong sa Bishop’s house sa ciudad sang Bacolod sa diin ginpatigayon ang prayer rally.
Katuyuan sang lihok amo ang pagpanawagan para sa madasig nga hustisya kay Mondia nga ginluthang sa Jaro, Iloilo City kag politika ang ginatudlo nga motibo.
Nahibaluan nga biktima ang kandidato sa pagka-alkalde sa Pulupandan batok sa incumbent nga alkalde nga si Magdaleno “Magsy” Peña.
Sa subong wala pa sang nadakpan nga suspetsado ang kapulisan apisar sang ila pahayag nga natumod na ang responsable sa krimen.
Si Mondia ang nakatalana nga igalubong sa adlaw sang Domingo, Febrero 28, 2010 sa Sanctuario de Bacolod matapos nadesisyunan sang pamilya nga indi na pagdal-on pa sa ila bawa sa Pulupandan agod makalikaw sa gamo bangod sa political tension.
KORONADAL CITY – Bangud sa na-eksperyinsiyahan nga brownouts sa Mindanao, nag-apela ang Cotabato Light and Power Company (Colight) sa Cotabato City sa mga konsumidores na magkinot sa paggamit sang koryente.
Nahibaluan nga sa Cotabato City, ginapatuman ang 30 minutos nga brownouts tagsa ka adlaw halin sang nakaligad nga semana apang subong ginpatuman na ang tig-duha ka oras sa sulod lamang sang isa ka adlaw.
Ini ang kasunod sang manubo nga water level sang Lake Lanao kag Pulangi river nga yara sa red alert status nga nagapadalagan sa mga dalagkuan nga hydro power plant sa Mindanao.
Ginpaathag sang Colight nga kalakip sa ila nga lugar nga gina-suplayan sang koryente ang Cotabato City, Sultan Kudarat kag Datu Odin Sinsuat sa Maguindanao.
Ginpamilit sini nga maswerte pa ang mga konsumedores sa ila kun ikumpara sa mga taga-South Cotabato kag North Cotabato nga tuman naapektuhan sang brownouts.
ROXAS CITY – Nag-abot sa syudad sang Roxas ang mga katapo sang Commission on Filipinos Overseas.
Tuyo sang grupo nga ipahibalo sa publiko ang ginapatigayon nga community education campaign sang ila ahensiya batuk sa human trafficking, illegal recruitment, domestic violence kag inter marriage .
Ginpahanumdum ni Atty Golda Myrna Roma Chief Emigrant Services officer ang mga pilipino nga nagahandum magtrabaho sa iban nga nasyon nga maghalong sa illegal recruiters, bangud madamo na nga mga pinoy ang na-biktima sini sa kagustuhan nga makatrabaho sa iban nga nasyon para mabutong sa kapigaduhon ang ila pamilya.
Suno kay Atty Roma nga wala sang malain sa pagtrabaho sa iban ng nasyon, apang siguraduhon nga indi matuntuhan kag matiplang sang mga illegal recruiters sa pungsod .
Subongman ginpanugyanan sini ang mga pinay nga na-enganyo sang ila ka-chatmates nga ginpromesahan nga pakasalan nga indi gid maglaum sang tuman bangud madamo na sang mga kaso nga narecord nga pag-abot sa lugar sang ila mapangasawa ginaabuso lamang ang mga ini kag kun kaisa ginabaligya pa.
Samtang sa isyu naman sang human trafficking, ginsiling ni Atty Roma nga madamo na sila sang narecord nga kasubong sini nga mga kaso, sa diin kadam-an sa nangin biktima ang mga babae kag mga bata.
ILOILO CITY – Ginmandu sang Office of the Ombudsman-Visayas nga mahimu na nga ipadayun ang preliminary investigation sa graft charges kag technical malversation nga ginpasaka batok kay Lambunao, Iloilo Mayor Reynor Gonzales kag sa municipal accountant nga si Sofia Balago.
Sa ginpagwa nga mandu sang ombudsman, ginahatagan sang pulo ka adlaw ang duha ka respondents nga makapasa sang ila counter affidavit may kaangtanan sa ginpasaka nga reklamu sa ila.
Ang ginpasaka nga graft charges kag technical malversation ang nag-ugat sa cash overdraft sang municipal government nga naglab-ot sa P8.3 milyon kasunod man sang massive cash kag cheque withdrawal lakip na ang juggling of fund sang Priority Development Assistance Fund (PDAF) sang tiglawas sang 3rd district sang Iloilo kun sa diin kabahin ang banwa sang Lambunao.
ILOILO CITY– Ginpamilit sang Philippine Roll-on/Roll-off Operators Association (PROA) nga wala sila ginapamatian ni Presidente Gloria Mcapagal Arroyo rason sang ila pagpatigayon sang maritime holiday sa maabot nga Marso 1 sa paglaum nga mahatagan na sang atensyon sang presidente ang ila problema sa ginapatuman nga policy sang Maritime Industry Authority (MARINA) ilabi na ang pinakaulihi nga mandu sang ahensya sa mga shipping company sa pagbakal sang bag-o nga life vest.
Sa interview sang Bombo Radyo Iloilo kay PROA Chairman of the Board Col. Leonardo Ordonio, ginpahayag sini nga una na sila nga nagpadala sang open letter a presidente apang ini ang wala man ginsapak.
Nagalaum kuntani ang PROA nga kaangay sang pagpakigsugilanon sang Metro Manila Development Authority (MMDA) kag Land Transportation Office (LTO) sa transport group nga nagplanu mag transport strike, sugilanunon man sila sang MARINA.
Gin-ako man ni Ordonio nga indi man kuntani nila luyag mag-maritime holiday bangud kun panumdumon sila man ang magapamierdihan apang nakahanda man sila sa tion nga suspindihon sang MARINA ang ila prangkisa.
Wala naman nakaluwas sa PROA ang mga reactive nga policy sang MARINA nga gindesignar sa tion nga may matabu nga trahedya sa dagat.
Sunu kay Ordonio, kulang sa modenization program ang MARINA kag sa baylo nga reactive policy, mas makapaayo kun hatagan pagtamod sang ahensya ang pagpatuman sang mga polisa para sa paglikaw sa pagluntad sang trahedya sa dagat.
Ginabanta 90 porsyento sang byahe sang mga RORO sa pungsod ang maapektuhan sa tion nga madayun ang maritime holiday sa Marso 1 nga buylugan sang 30 ka shipping company kag kapin 200 ka mga barko.
ILOILO CITY — Mahimu nga magpasaka sang presyo ang mga water refilling stations sa syudad sang Iloilo may kaangtanan gihapon sa epekto sang tuman nga tig-ilinit.
Suno kay Atty. Franklin Andrada, presidente sang Iloilo Purified Drinking Water and Supplier Association Inc., duha ka water sources ang ila ginakuhaan nga ginalakipan sang shallow water sources sa banwa sang Leganes, Iloilo kag Metro Iloilo Water District (MIWD).
Apang kasunod sang gina-eksperyensya subong nga tig-ilinit, nagnubo na ang supply nga tubig nga ila makuha sa mga shallow water sources samtang may mga bes naman nga nagalab-ot sa tatlo ka adlaw nga indi sila makabaton sang supply sang tubig gikan sa MIWD.
Bangod sini, isa sa ginatan-aw nga option sang asosasyon ang pagpasaka sang bili sang tubig nga ginabaligya agud makabawi.
Recent Comments