BACOLOD CITY – Dugang nga mga suldado kag K9 units ang nagabulig sa 62nd Infantry Battalion sa paglagas sa mga rebeldeng New People’s Army nga ila naka-engkuwentro sadtong Domingo sa Sitio Aluyan, Brgy. Caduhaan, Cadiz City.

Ang engkuwentro sa tunga sang mga suldado sang 62nd IB kag kapin 30 ka mga rebelde nga ginapatihan miembro sang Larangan Northern Negros (KLNN) ang nagresulta sa kamatayon sang isa ka opisyal sang army kag anom ka mga rebelde.

Suno kay Col. Maximo Caro, 303rd Infantry Brigade commander, ang grupo sang mga rebelde ang ginapamunuan ni Ramon Amaca, bana ni Charity Amaca nga amo ang deputy secretary sang KLNN nga responsable sa mga kalakasan sa Northern Negros.

Samtang, padayon man nga gina-verify sang mga suldado ang report sang mga civilian nga ila nakita nga duha pa ka mga rebelde ang patay sa amo nga engkuwentro nga gindala palagyo sang ila mga kaupdanan.

Sa karon, duha pa lang sa anom ka mga rebelde nga nagkalamatay ang ila nakilala nga ginalakipan nanday Rotchel Hilado, 19 anyos sang Hunob-Hunob, Escalante City kag Jovanie Romano, 37 anyos sang San Pablo, Manapla .

Si Hilado ang ginkilala sang iya iloy nga si Ninfa samtang si Romano ang ginkilala naman sang ila Brgy. Kapitan nga si Benjie Cabayao.

Samtang ang opisyal sang militar nga si 1Lt. Archie Polenzo ang yara sa isa ka puneraria sa Bacolod City kag nakatalana naman nga ipadala sa ila lugar sa Pagadian City.

KORONADAL CITY – Ginakabalak-an nga liwat naman nga magapangataki ang mga peste sa South Cotabato kadungan sa nagalala nga tig-ilinit ukon El Niño phenomenon.

Suno kay South Cotabato Agriculture Officer Rey Legaste nga posible magpanalasa liwat ang mga peste nga nagapangguba sa mga pananom kasubong sang mga apan (grasshoppers), blag bugs kag army worms matapos nga napaiway ang pagpatigayon sang cloud seeding operation bangud sa kawad-an sang mga seedable clouds.

Sa subong, yara na sa masobra P54-milyones pesos na ang damyos nga gintuga sang El Niño sa probinsiya.

Kaangot sini, ginarekomendar na sang provincial agriculture nga ipaidalom sa state of calamity ang banwa sang T’boli nga tuman nga gin-igo sang tig-ilinit.

Gindugang pa sang nasambit nga opisyal nga lauman na ang pag-guluwa sang mga peste nga ilaga, grasshoppers, black bug kag army worms sa tion nga wala sa gihapon sang ulan sa probinsiya tubtub sa bulan sang Abril kag Mayo.

ILOILO CITY – Isa sa mga ginabasol sang simbahan ang justice system sang pungsod sa mataas nga numero sang krimen ilabi na ang pagpanghimulos kag iban pa nga sexual abuse.

Sa interview sang Bombo Radyo Iloilo kay Msgr. Meliton Oso, director sang Jaro Archbishop Social Action Center (JASAC), ginpahayag sini nga sa subong daw kaangay lang nga wala na nahadluk ang mga kriminal sa penalidad nga nagahulat sa ila sa tion nga mapamatud-an nga nakasala.

Ini bangud indi perpekto ang justice system kun sa diin madamu sa mga nakasala ang wala man masilutan.

Apang wala naman nagapati ang simbahan nga ang paghatag sang death sentence ukon silot nga kamatayon ang epektibo sa pagtapna sa kriminalidad.

ILOILO CITY – Makaalarma na ang pagsaka sang kaso sang sexual abuse sa Rehiyon 6 santu sa pinakaulihi nga impormasyon nga nakuha sang Bombo Radyo Iloilo sa Department of Social Welfare and Development (DSWD).

Nahibaluan nga sang nakaligad nga semana walo na ka kaso sang sexual abuse ang nabaton sang ahensya.

Sa subong may yara sang 32 ka mga biktima sang sexual nga pagpang-abuso ang yara sa pag-inakop sang DSWD sa ila Center Home for Girls sa idalum ni Judith Tanyate.

Ang mas makalaarma pa sunu sa DSWD amu nga kalabanan sa mga biktima sang sexual nga pagpang-abuso naghalin sa imul nga pamilya kag ginabiktima sang ila man lang malapit nga himata.

ILOILO CITY – Lunsay confine sa Western Visayas Medical Center sa Mandurriao, Iloilo City ang mag-utod nga Gaban, residente sang Poblacion, Buenavista, Guimaras, matapos maglab-anay sang kaagahon.

Sa nakuha nga impormasyon sang Bombo Radyo Iloilo sa utod sang mga biktima, hubog ang 25-anyos nga si Wilson Gaban kag samtang nagabais ini sa iya asawa, ginsaway sang iya magulang nga si Jerson, 29-anyos.

Naakig ang manghod kag nagpahayag nga sunugon ang ila balay rason nga naakig man ang magulan sini tubtub sila ang nagbaisay.

Una nga ginlabu sang magulang ang manghod sini apang sang makit-an nga napilasan ang biktima, nagpangayu ini sang bulig agud dal-on sa hospital apang sa iya pagkasandad, ginlabu man sang iya manghod.

Ang duha lunsay nag-angkon sang pilas sa ulo kag sunu sa utod nga babaye sang mga ini, lunsay man nagakabalaka sa sitwasyon sang isa kag isa.

ILOILO CITY – Daku na ang halit sang El Niño phenomenon sa Iloilo base sa report sang Provincial Agriculture Office kun sa diin nagalab-ot na sa 31,000 ektarya sang pananum ang apektado.

Ini kasunod sang ginpatigayon nga meeting kahapon sa tunga sang Provincial Disaster Coordinating Council (PDCC), Provincial Agriculture’s Office kag iban pa nga ahensya lakip na si Iloilo Governor Niel Tupas Sr. kun sa diin gintalakay ang pagpaidalum sa probinsya sang Iloilo sa State of Calamity.

Sa ginhiwat nga pagsinapol, ginplastar ni Dr. Ildefonso Toledo ang damage report sang DA kag kun pila na ka ektarya sang mga pananum nga palay ang apektado sang tig-ilinit.

Apang palamangkutanon naman para kay PDCC Executive Officer Jerry Bionat kun diin naghalin ang damage report sang DA bangud base sa ila nabaton nga official report, 2 sa 42 ka banwa pa lang sa Iloilo ang nakasomiti sang ila damage report.

ILOILO CITY — Naglab-ot sa 112 ang naaresto sa Western Visayas bangod sang paglapas sang ginapatuman nga gun ban sang Commission on Elections (Comelec) santo sa pinakaulihi nga record sang Police Regional Office 6 (PRO6).

Sa gihapon nagapanguna diri ang probinsya sang Negros Occidental nga may yara sang 36, nagapangaduha ang Bacolod City nga may 19 kag nagapangatlo ang probinsya sang Capiz nga may 16.

Onse ka mga tawo naman ang nadakpan sa probinsya sang Iloilo samtang lima naman sa Iloilo City kasubong man sa Aklan kag Antique kag tatlo naman sa Guimaras.

Sa 112 ka mga nagkaladakpan, duha diri ang miembro sang Armed Forces of the Philippines (AFP), anom ang government officials, 93 ang civilian kag ang11 ka iban pa ginalakipan sang security guards, CAFGU, RPA-ABB, security officer kag rebelde nga CPP-NPA.

Naglab-ot naman sa 90 ka mga armas luthang, 27 ka patalom kag lima ka granada ang nakumpiskar sa bug-os nga rehiyon.

Sa karon 92 na sa mga nagkaladakpan ang napasakaan sang kaso sa korte samtang under investigation naman ang 13 ka iban pa.

BACOLOD CITY – Nagsaka na sa P11,487,120 ang kahalitan nga gintuga sang El Niño Phenomenon sa Negros Occidental sa pananom kag kasapatan.

Base sa report sang Provincial Agriculture’s Office ang kahalitan sa pananom nalab-ot na sa P9,114,040.

Naglab-ot na sa 10 ka banwa kag tatlo ka mga ciudad sa probinsya ang apektado matapos nagkalalaya ang ila tanom nga humay, mais kag mongo.

Kalakip sa mga lugar nga naapektuhan amo ang Murcia, Himamaylan City, Cauayan, La Castellana, Ilog, Hinoba-an, Kabankalan City, Hinigaran, Calatrava, Binalbagan, Sipalay City, Ilog, kag Isabela.

Samtang, sa report sang Provincial Veterinary Office naglab-ot naman sa P2,373,080 ang kahalitan sa bahin sang kasapatan.

Madamo na mga kasapatan ang nagkalamatay tuga sang tuman nga kainit sang panahon nga ginalakipan sang karabaw, baka, kanding, baboy, manok, pato, kag mangin ang mga inugbulang nga manok sa pito ka ciudad kag 12 ka kabanwahanan

Ini ang ginalakipan sang Cadiz City, Victorias City, Bago City, Moises Padilla, Binalbagan, Himamaylan City, Kabankalan City, Ilog, Hinoba-an, Murcia, La Castellana, EB Magalona, Manapla, Toboso, Calatrava, San Carlos City, Silay City, Hinigaran kag Candoni.

Samtang, sa bug-os nga Western Visayas, naglab-ot na sa P761.2 million ang balor sang humay nga nahalitan sang El Niño kag naglab-ot naman sa 43,187 ka mangunguma ang apektado.

ILOILO CITY – Ginreklamu sa Bombo Radyo Iloilo sang isa ka concerned citizen ang manunudlo nga si Laila Garcia sa Sibukawan Elementary School sa banwa sang Tubungan, Iloilo bangud sa pagpamintas sa mga estudyante.

Sa interview sang Bombo Radyo Iloilo sa tagreklamu, ginpahayag sini nga ginasakit sang manunudlo ang mga estudyante sini kag masami nagaangkon sang pilas kag lagub sa ila lawas bangud sa kusi kag bakul.

Madugay na nga ginareklamu sang mga ginikanan ang kapintas sang manunudlo apang nahadluk man ang mga ini bangud ginapasuni miembro sang New People’s Army (NPA) ang bana sini.

Luyag kuntani sang mga ginikanan nga sayluhon sa iban nga eskwelahan ang ila ginareklamu nga manunudlo apang ginapasuni wala man ginahatagan pagtamod sang district office sang Department of Education (DepEd) kag malapit man ini sa head teacher sang eskwelahan.