ILOILO CITY– Ginahandaan na subong sang Department of Agriculture provincial office sa Iloilo ang mahimu epekto sang El Niño phenomenon sa probinsya sang Iloilo.

Sa interview sang Bombo Radyo Iloilo, nagpanawagan si Dr. Eldefonso Toledo, Provincial Agriculture Officer, sa mga mangunguma nga magpakig-angot kag gilayon i-report sa iya talatapan ang mga halit sa ila pananum ilabi na sa mga humay bangud sa epekto sang mainit nga panahon.

Ginpaathag ni Toledo nga paagi sini, mangin madasig para sa DA nga marekord ang halit kag makadihon sang solusyon.

Ginpanugyan man sini sa mga mangunguma nga magpangita sang alternatibo nga pamaagi agud mahagan-hagan ang epekto sang tig-ilinit.

Ginrekomendar sini ang pagsagod sang kasapatan, pagtanom sang ulutanon kag fruit tress nga nagatubo sa tion sang tig-ilinit.

Nahibaluan nga ang Iloilo ang isa sa mga producer sang bugas sa Rehiyon 6.

KORONADAL CITY – Ginpasiguro sang militar sa probinsiya sang Sultan Kudarat nga mabantayan ang mga vital installation sa probinsiya sa ginpatigayon nga May 10, 2010.

Ini ang ginpahayag ni Lt. Col. Gerardo Barrientos sang 104th Brigade sang Philippine Army nga nakabase sa Kalandagan, Tacurong City sa ginpatigayon nga command conference sa provincial Comelec sang Sultan Kudarat.

Ginpahayag ni Col. Barrientos nga pagabantayan nila ang mga power lines sa Tacurong sa diin dako nga area ang maapektuhan sa tion nga maguba ang linya sang nasambit nga lugar.

Kaangot sini, ginahingyo ni Barrientos ang kooperasyon gikan sa mga residente ilabi na ang pag-report sa ila sang mga makaduluda nga tawo sa ila area of responsibility.

Dugang pa sini nga preparado ang pamunuan sang 104th Brigade sa igapatigayon nga computerized election.

Seryoso suno pa ang militar nga magpatuman sang derektiba gikan sa Comelec agud nga mangin malimpyo ang piniliay.

BACOLOD CITY – Ipaidalom sa 30-adlaw nga retraining sa Camp Martin Delgado sa Iloilo City ang 15 ka kapulisan sa Negros Occidental nga nagapangatubang sang kaso kriminal kag administratibo, kag ang mga may character aptitude problems.

Suno kay Negros Occidental Police Provincial Ofice Director, Senior Supt. Manuel Felix patigayunon ang Character and Aptitude Development Training sa Febrero 8 tubtub Marso 19, 2010..

Suno kay Felix dugang pa nga lima ka kapulisan ang iya ginrekomendar nga magpaidalom sa kasubong nga training nga nagatuyo sa pagpasanyog sang ila attitude sa ila trabaho kag mangin mas epektibo sa obligasyon sa mga pumuluyo.

Ang mga ini ang kapulisan ang assign sa Ilog kag Candoni police stations.

Gin-ganyat ni Region 6 police director Isagani Cuevas sa mga provincial kag city police directors nga mag sumiter sang dugang nga mga ngalan sang kapulisan nga naga kinahanglan sang retraining.

Samtang, base sa record sang kapulisan pila sa mga erring policemen nga ginpaidalom sa retraining sang nagligad nga tuig ang ginpadala sang ulihi sa Mindanao.

BACOLOD CITY–Kasunod sang nagahilapit nga pagretiro sa serbisyo, ginpahayag ni Armed Force of the Philippines Chief of Staff Gen. Victor Ibrado nga indi na siya mag extend sang termino.

Suno kay Gen. Ibrado nga maga retire na siya sa serbisyo sa maabot nga bulan sang Marso 2010 kag wala sang plano nga magpabilin pa ukon mag extend sang termino bilang AFP chief.

Gin-athag sini nga sa karon wala man sang ginatanyag sa iya nga position sa gobierno ukon posibilidad nga mangin isa sa miembro sang gabinete ni Presidente Gloria Macapagal Arroyo.

Nahibaluan nga maga retire si Ibrado samtang masako na ang preparasyon sa Mayo 10, 2010 presidential election kag madamo ang naga suhestiyon nga dapat iga-extend ang iya termino agod may estable nga liderato ang AFP nga malahalon para sa bug-os nga proceso sang election.

KORONADAL CITY- Indi daku nga problema sa justice system sang Pilipinas sa tion nga magretiro na si Chief Justice Renato Puno.

Ginpahayag sa Bombo Radyo Koronadal ni Atty. Emmanuel Fontanilla nga magapadayon sa gihapon ang normal nga dalagan sang operasyon sa Korte Suprema sa tion nga wala pa sang may madesignar nga chief justice nga magatal-os kay Puno.

Suno kay Fontanilla, may yara naman nga Senior Justice nga magapungko bilang Chief Justice.

Samtang, nagapati naman si Fontanilla nga ginatinguha lamang ni Pangulong Gloria Macapagal Arroyo nga mangin solido ang bug-os nga justices sa Korte Suprema antes pa man matapos ang iya nga termino bangud nga makabulig ini sa iya sa tion nga pasakaan siya sang kaso.

Gindugang pa sini pa nito na ‘unconstitutional’ sa tion nga igapamilit ni Pangulong Arroyo nga magdesignar sang bag-o nga chief justice bangud nga nakapagkit sa laye nga bawal sa tanan nga mga opisyal nga magaretiro nga magdesignar sang mga bag-o nga empleyado sang gobyerno.

ILOILO CITY – Dismayado si Iloilo City Mayor Jerry Treñas sa pagpabor sang Supreme Court (SC) nga mangin syudad ang 16 ka banwa sa pungsod.

Ini matapos ginbaliskad sang Korte Suprema ang nauna sini nga desisyun nga indi pagpabor sa cityhood sang 16 ka banwa sa pungsod nga nag apply.

Sa interview sang Bombo Radyo Iloilo kay Treñas, ginpahayag sini nga nagakahangawa siya nga bangud sa pagdugang sang numero sang syudad sa pungsod, mabuhinan sang ginabantay P30 tubtub P40 milyon pesos ang Internal Revenue Allotment (IRA) sang syudad sang Iloilo.

Ginkahangaw-an man sang alkalde nga mahimu hingalitan sang iban nga banwa nga nagahandum mangin syudad apang indi man kwalipikado ang nangin desisyun sang SC ilabi na subong nga may nakapending pa sa Kongreso nga hagna nga nagaduso nga himuon syudad ang tanan nga capital town sa pungsod.

Apang nagalaum naman ang alkalde sang Iloilo City nga paboran sang Korte Suprema ang ila gin-file nga motion for reconsideration.

ILOILO CITY – Nagpanindugan ang Gabriela partylist nga indi dapat pagpaboran ang ginaduso nga renewable marriage sang Isa-Ako Babaeng Astig Aasenso partylist.

Sa interview sang Bombo Radyo Iloilo kay Gabriela Representative Lisa Masa, ginpahayag sini nga malabo nga magmadinalag-on ang ginaduso nga renewable marriage bangud mangin sa iban nga pungsod, wala sang kaangay nga kasuguan.

Sa baylo, ginpahayag sini nga mas makapaayo kun ipatuman na lang ang divorce sa pungsod.

Ginpaathag ni Masa nga kinahanglan ang divorce ilabi na sa mga biktima sang pagpang-abuso.

Sunu sa iya, bisan ginapahanugutan ang annulment sa aton pungsod, tuman naman ka mahal ang proseso sini samtang sa legal separation naman nga ginapahanugutan man sa Pilipinas, wala sang kahigayunan ang mga nagbulagay nga mag-asawa nga liwat magpakasal.

Apang gin-athag sini nga kun paboran gid man ang ila ginaduso nga divorce, indi ini mangin madali para sa mga mag-asawa nga luyag magbulagay kaangay sa nagakatabu sa luwas sang pungsod.

Sunu kay Masa, may igaplastar sila nga mga basehan agud makafile sang divorce ang isa ka mag-asawa.

Sa subong sunu kay Masa, nakatalana na para sa hearing sa komitiba sa Kongreso ang ila ginaduso nga hagna may kaangtanan sa diborsyo.

ILOILO CITY– Nagpaandam ang Bangko Sentral ng Pilipinas (BSP) sa publiko may kaangtanan sa mga nagalapta nga peke nga kwarta samtang nagahilapit ang May 10 elections.

Sa interview sang Bombo Radyo Iloilo kay Job Nepumoceno, deputy director sang BSP-Iloilo, ginpanugyan sini sa publiko nga mangin mausisa sa mga kwarta nga ila ginabaton ilabi na ang mga may dalagku nga balor.

Ginpahanumdum sini nga ang genuine nga kwarta naka alligned ang serial numbers, may embedded security features kag makit-an man ang daw kaangay sang fiber nga nakabutang sa kwarta.

Isa man sa dapat lantawon agud mahibaluan kun peke ang kwarta amu ang laragway sang national hero nga nakabutang.

Nahibaluan nga may pila na nga nakabaton sang peke nga kwarta ilabi na ang 500 peso bill kag indi malikawan nga ini ang gamiton man nga kahigayunan sang mga politiko sa eleksyon.

ILOILO CITY– Nakahanda na ang Iloilo City Police Office (ICPO) sa natalana nga pagpatuman sang national gun ban nga magasugod buas nga adlaw.

Sa interview sang Bombo Radyo Iloilo kay ICPO Director Police Senior Superintendent Melvin Moncal, duha ka programa ang ila ipatuman.

Ini ang ginalakipan sang ‘Oplan Bakal’ kun sa diin magahimu sang operasyon ang mga pulis sa mga establishments agud mausisa kun may ginatago nga mga armas kag ‘Oplan Sita’ nga ipatuman naman sa mga checkpoint operations sa mga salakyan.

Ginpasiguro ni Moncal nga mangin agresibo ang ICPO sa pagpatuman sang gun ban kag hugot nga bantayan ang mga suspek sa pagdala sang pusil.

Nahibaluan nga ang mga naka-uniporme lang nga mga pulis ukon militar ang ginapahanugutan nga magdala sang pusil kadungan sa ipatuman nga gun ban may kaangtanan sa eleksyon sa Mayo.