ILOILO CITY – Nakilala na sang gintukod nga task force nga naga-imbestigar sa pagpatay kay mayoralty candidate Luis Mondia sang Pulupandan, Negros Occidental ang ngalan sang anum ka mga suspek sa krimen.

Ginkilala ang anum ka mga suspek nga sanday Bernard Pacifico, Primitivo Pacifico, Joebert Gumban, Eusebio Poblacion, Gerry Solido, Romy Inoho kag isa ka alyas Otong Law-law kun sa diin apat sa mga ini ang napasakaan na sang kaso nga murder.

Sa interview sang Bombo Radyo Iloilo kay Police C/Supt. Isagani Cuevas, director sang Police Regional Office (PRO6), ginpahayag sini nga nakilala ang mga suspek paagi sa mga testigo nga nakakita sa mga ini sang matabu ang pagpatay sa anay alkalde sa gwa sang Jaro Cathedral, Jaro, Iloilo City.

Ginpahayag ni Cuevas nga lunsay miembro sang robbery hold-up group ang nakilala nga mga suspek sa pagpatay sa anay alkalde sa gwa sang Jaro Cathedral, Jaro, Iloilo City.

Sa subong indi pa mapat-od kun sin-o sa nakilala na nga mga suspek ang nagluthang gid sa biktima.

ILOILO CITY — Naglab-ot sa 112 ang naaresto sa Western Visayas bangod sang paglapas sang ginapatuman nga gun ban sang Commission on Elections (Comelec) santo sa pinakaulihi nga record sang Police Regional Office 6 (PRO6).

Sa gihapon nagapanguna diri ang probinsya sang Negros Occidental nga may yara sang 36, nagapangaduha ang Bacolod City nga may 19 kag nagapangatlo ang probinsya sang Capiz nga may 16.

Onse ka mga tawo naman ang nadakpan sa probinsya sang Iloilo samtang lima naman sa Iloilo City kasubong man sa Aklan kag Antique kag tatlo naman sa Guimaras.

Sa 112 ka mga nagkaladakpan, duha diri ang miembro sang Armed Forces of the Philippines (AFP), anom ang government officials, 93 ang civilian kag ang11 ka iban pa ginalakipan sang security guards, CAFGU, RPA-ABB, security officer kag rebelde nga CPP-NPA.

Naglab-ot naman sa 90 ka mga armas luthang, 27 ka patalom kag lima ka granada ang nakumpiskar sa bug-os nga rehiyon.

Sa karon 92 na sa mga nagkaladakpan ang napasakaan sang kaso sa korte samtang under investigation naman ang 13 ka iban pa.

BACOLOD CITY – Nagsaka na sa P11,487,120 ang kahalitan nga gintuga sang El Niño Phenomenon sa Negros Occidental sa pananom kag kasapatan.

Base sa report sang Provincial Agriculture’s Office ang kahalitan sa pananom nalab-ot na sa P9,114,040.

Naglab-ot na sa 10 ka banwa kag tatlo ka mga ciudad sa probinsya ang apektado matapos nagkalalaya ang ila tanom nga humay, mais kag mongo.

Kalakip sa mga lugar nga naapektuhan amo ang Murcia, Himamaylan City, Cauayan, La Castellana, Ilog, Hinoba-an, Kabankalan City, Hinigaran, Calatrava, Binalbagan, Sipalay City, Ilog, kag Isabela.

Samtang, sa report sang Provincial Veterinary Office naglab-ot naman sa P2,373,080 ang kahalitan sa bahin sang kasapatan.

Madamo na mga kasapatan ang nagkalamatay tuga sang tuman nga kainit sang panahon nga ginalakipan sang karabaw, baka, kanding, baboy, manok, pato, kag mangin ang mga inugbulang nga manok sa pito ka ciudad kag 12 ka kabanwahanan

Ini ang ginalakipan sang Cadiz City, Victorias City, Bago City, Moises Padilla, Binalbagan, Himamaylan City, Kabankalan City, Ilog, Hinoba-an, Murcia, La Castellana, EB Magalona, Manapla, Toboso, Calatrava, San Carlos City, Silay City, Hinigaran kag Candoni.

Samtang, sa bug-os nga Western Visayas, naglab-ot na sa P761.2 million ang balor sang humay nga nahalitan sang El Niño kag naglab-ot naman sa 43,187 ka mangunguma ang apektado.

BACOLOD CITY – Patay ang isa ka pastor nga nabungguan sang truck samtang naga-bike sa banwa sang Pontevedra, Negros Occidental kaina sang aga.

Ang biktima amo si, Jojie Gallego, 50-anyos sang San Enrique, Negros Occidental nga dead on the spot matapos nawasak ang ulo sang nalapakan sang goma sang salakyan.

Suno kay C/Inps. Argel Ancheta, hepe sang Pontevedra Police Station, natabo ang aksidente alas 6:05 kaina sang aga sa highway sang Brgy. San Juan, Pontevedra samtang nagasunod ang truck sa bike sang biktima.

Ginpahayag nga nagtabog ang biktima sa ginasakyan nga bike kag nalapakan pa sang salakyan ang iya ulo rason sang iya gilayon nga kamatayon.

Detain naman ang driver sang truck nga si Joel Alegre sang Bonifacio, Sagay City matapos nagsurrender.

Gikan sa Sagay City ang truck karga ang inugdeliver nga quick lime sa sugar central sa Kabankalan City sang natabo ang aksidente.

ILOILO CITY – Anum ka suspek ang pasakaan sang kaso sa pagpatay kay anay Pulupandan, Negros Occidental Mayor Luis Mondia sa gwa sang Jaro Cathedral, sa Jaro, Iloilo City sang nakaligad nga bulan.

Sa interview sang Bombo Radyo Iloilo kay C/Supt. Isagani Cuevas, director sang Police Regional Office 6 (PRO6), nakilala na ang duha sa anum ka mga suspek matapos makuhaan sang impormasyon ang mga testigo sa krimen.

May ngalan naman sang mga suspek ang kapulisan apang nagbalibad si Cuevas sa pagsugid kun sin-o ang mastermind sa krimen.

Nakabaton naman sang impormasyon ang kapulisan nga antes ginpatay ang anay alkalde, nag cash advance sang P100,000 ang mga suspek kun sa diin ginapasuni nga P1 milyon ang kabilugan nga ginbayad sa mga nagpatay sa anay alkalde.

BACOLOD CITY – Ginareklamo ang National Federation of Sugar Planters (NFSP) sa probinsya sang Negros Occidental ang indi mapaathag nga pagnubo sa pressyo sang kalamay.

Suno kay Mr. Enrique Rojas, presidente sang NFSP maka-alarma ang pagnubo sa presyo sang kalamay apisar sang bastante nga domestic supply sang kalamay.

Nagaduda ang mga ini nga may iban nga sector nga nagmanipulate sa presyo agod makabintaha apang sa kagastuhanan sang mga sugar producers.

Angot sini ginaduso sang NFSP sa Sugar Regulatory Administration (SRA) nga magpakig-angot sa Department of Trade and Industry agod tan-awon ang posibilidad sang manipulation sa presyo sang kalamay agod maprotehiran ang mga producers.

Ginahinyo man sang NFSP sa SRA nga mag pakig-angot sa Land Bank of the Philippines agod mabuligan ilabi na sa mga small planters, agod ila temporaryo nga ma hold ang ila nga quedans kag mapanginpuslan ang maayo nga presyuhanay sa pagtakop sang milling season.

Samtang, una na nga ginpahayag sang SRA nga indi kontrolado sang gobierno ang pagnubo sa presyo, matapos nga nagnubo ang presyo sang kalamay sa world market.

BACOLOD CITY – Nagpatigayon sang rally ang mga taga-supporta ni Luis Mondia, ang anay alkalde sang Pulupandan, Negros Occidental nga ginpatay sa Iloilo City.

Ginatos nga mga supporters ang nag-upod sa rally nga nagsugod alas 2:00 sang hapon gikan sa banwa Pulupandan padulong sa Bishop’s house sa ciudad sang Bacolod sa diin ginpatigayon ang prayer rally.

Katuyuan sang lihok amo ang pagpanawagan para sa madasig nga hustisya kay Mondia nga ginluthang sa Jaro, Iloilo City kag politika ang ginatudlo nga motibo.

Nahibaluan nga biktima ang kandidato sa pagka-alkalde sa Pulupandan batok sa incumbent nga alkalde nga si Magdaleno “Magsy” Peña.

Sa subong wala pa sang nadakpan nga suspetsado ang kapulisan apisar sang ila pahayag nga natumod na ang responsable sa krimen.

Si Mondia ang nakatalana nga igalubong sa adlaw sang Domingo, Febrero 28, 2010 sa Sanctuario de Bacolod matapos nadesisyunan sang pamilya nga indi na pagdal-on pa sa ila bawa sa Pulupandan agod makalikaw sa gamo bangod sa political tension.

ILOILO CITY– Nagapadayun ang imbestigasyon sang Regional Intelligence Unit (RIU) sang Police Regional Office 6 (PRO6) sa suspek sa pagpatay sa anay alkalde sang Pulupandan, Negros Occidental nga nagapapili subong nga eleksyon nga si Luis Mondia.

Sa interview sang Bombo Radyo Iloilo kay S/Supt. Cornelio Defensor, chief sang RIU, nakilala na ang suspek sa pagpatay sa anay alkalde kag ini ang involve man sa mga insidente sang robbery hold-up sa syudad kag probinsya sang Iloilo.

Nahibaluan nga natapos na ang cartographic sketch sang isa sa mga suspek kag nakuhaan naman sang statement sang mga pulis ang pila sa mga testigo.

Matandaan nga ginluthang ang anay alkalde sang nakaligad nga semana sa kilid sang Jaro Cathedral, Jaro, Iloilo City.

BACOLOD CITY – Kumpirmado nga duha ka mga rebelde nga New People’s Army (NPA) ang patay sa natabo nga engkuwentro kaina sang aga sa tunga sang militar kag mga rebelde sa probinsya sang Negros Occidental.

Ang mga napatay ang ginalakipan sang isa ka babaye kag isa ka lalake nga yara pa sa encounter site kag padayon pa ang paghibalo sa ila identity.

Natabo ang engkuwentro las 5:30 sang kaagahon samtang nagapatrolya ang isa ka squad sang mga suldado sa Hda. Rosa, Brgy. San Pablo, Manapla sang may naghatag sa ila sang impormasyon nga may armado nga grupo sa lugar.

Suno kay Staff Sgt. Romeo Arellano, detachment commander sang 12th Infantry Battalion nga nagapamuno sa patrolya, una nga nagpalupok ang rebelde nga babae nga amo ang napatay kag nagbulig naman ang ila kaupdanan sa diin naglab-ot sa 35 mintuos ang pagbayluhanay sang luthang tubtub nga nag-atras ang grupo sang mga rebelde.

Naka recover naman ang mga suldado sang duha ka M16 armalite rifle sa ginluntaran sang engkuwentro kaupod ang bangkay sang duha ka mga rebelde nga killed in action.

Padayon pa ang ginapatigayon nga hot pursuit operation sang mga suldado sa mga rebelde, sa tulong sang ginpadala nga reinforcement.