BACOLOD CITY – Naglab-ot na sa duha ka trucks ang mga posters ng ginpangkakas sang Commission on Elections (Comelec) sa Bacolod City nga wala sa designated common poster area.

Ini sa duha pa lamang ka operasyon sang Comelec sang nagsugod ang campaign period sa national positions kag mga party-list groups sadtong Febrero 9.

Suno kay Atty. Ryan Castro, election officer sang Bacolod City, indi sila mag-untat sa pagpangkakas sang mga campaign posters sang mga kandidato kag wala man sang pagapasensiyahon kon may yara sang madakpan nga nagapang-tapik sini sa indi designated areas.

Samtang, aminado ini nga indi sa gihapon maapektuhan ang mga kandidato nga tag-iya sang posters bangod indi man ang mga ini ang direkta nga nagapang-tapik kundi ang ila lamang mga supporters.

Sa gihapon, padayon ang pagpahanumdom ni Atty. Castro sa mga kandidato kag mga taga-suporta sini nga sundon ang guidelines sang Comelec sa pagpangampanya.

Labi pa nga maga-bantay ang Comelec kag pasanyugon ang operasyon sa pagsugod sang campaign period sang mga nagapadalagan sa lokal nga posisyon sa Marso 26, sa diin ginapaa-bot ang pagdata pa gid pagpang-tapik sang mga posters sang kandidato sa indi common poster areas.

BACOLOD CITY – Nag file na sang withdrawal of candidacy ang tukayo sang incumbent councilor nga naglunsar sang kandidatura sa Bacolod City.

Gin kumpirmar ni Bacolod Election Officer Atty. Ryan Castro nagpasa na sang tatlo ka pahina nga affidavit si Alex Castiller Paglomutan nga naga-isol sa iya kandidatura sa pagka konsehal sa 2010 elections.

Nakasaad sa iya affidait nga napilitan lamang siya sa pag file sang Certificate of Candidacy bangod sa pagduso sang konsehal sa ila barangay.

Gin-forward na ni Atty. Castro sa Comelec central office legal department ang affidavit agod amo ang magdagdag sang desisyon sa status sang kandidatura ni Paglomutan.

Samtang una diri, gin-ako ni Councilor Alex Albañez Paglumotan nga ginpangita niya ang tukayo kag ginhinyo nga mag-isol sa kandidatura.

Aminado si Councilor Paglumotan nga apektado siya sa pagkandidato sang tukayo bangod mabutang sa delikado ang boto kag kandidatura.

Nagapati ini nga may tawo sa likod nga tuyo magsabotahe agod halitan ang iya liwat nga pagpadalagan sa ika-tatlo na nga termino.

BACOLOD CITY – All set na ang talatapan sang Commission on Election (COMLEC) Bacolod para sa filing sang Certificate of Candidacy (COC) sumugod subong nga adlaw, Nobyembre 20 kag magatapos sa Disyembre 1.

Suno kay Atty. Ryan Castro, ang election officer sang COMELEC Bacolod handa na ang ila election assitants sa pagbaton sang COCs sang mga kandidato.

Impunto las 8:00 sang aga nagbukas na ang talatapan sang COMELEC kag handa na ang tanan nga personnel kag mga pormas nga kinahanglanon sa filing.

Nagalaum si Atty. Castro nga mangin matalunsay ang filing sa diin may ginpaguwa nga guidelines ang COMELEC sa proceso sang filing kag ginalauman nga ini ang na intiendihan sang mga kandidato.

Ginpanugyanan lamang sini ang mga kandidato nga kompletuhon na ang mga kinahanglanon nga documento ukon papeles sa pag file antes magpadulong sa ila talatapan.

Ginalauman nga diutay pa lang ang maga file sang COC sa una nga mga adlaw kasubong sang kinaandan.

Samtang temprano man nga nagbukas ang provincial COMELEC office sang Negros Occidental kag nakahanda sa pag akomodar sa mga maga file sang COCs.

Sa pihak nga bahin ginalauman ni Atty. Castro nga madula na ang disqualification cases bangod sa pre-mature campaigning kon maaprobahan na ang amendments sang Omnibus Election Code.

Ini bangod isa sa ginaduso nga amendments amo ang pagpahanugot sa mga politiko nga magkampanya apisar wala pa ang campaign period.