BACOLOD CITY – Biktima sang pagpang-abuso sexual ang amazona nga napatay sa engkuwentro sa Cadiz City, Negros Occidental sadtong Domingo rason nga ini ang nagsulod sa hublag sang rebeldeng New People’s Army.

Ini ang ginpahayag sang iloy mismo sang napatay nga si Rotchel Hilado, 19-anyos sang Hunob-Hunob, Escalante City, Negros Occidental matapos na identify ang bata.

Suno sa iloy nga si Ninfa Hilado, naglisensiya gid lamang si Rotchel sadtong nagligad nga tuig nga magapangita sang trabaho sa ciudad sang Bacolod matapos naka-gradwar sa high school apang wala na makapauli.

Ulihi lang sini nahibaluan gikan sa mga kaabyanan sang anak nga ini ang ginhimuslan sang iya kaugalingon nga amay rason nga nagbiya sa ila balay.

Iya ginpadulungan ang bangkay sa Cadiz City matapos nakabaton sang impormasyon nga may kaanggid kay Rotchel ang bangkay sang amazona nga napatay sa encounter.

Sang gintan-aw ang bangkay, positibo sini nga ginkilala ang anak.

ILOILO CITY – Isa sa mga ginabasol sang simbahan ang justice system sang pungsod sa mataas nga numero sang krimen ilabi na ang pagpanghimulos kag iban pa nga sexual abuse.

Sa interview sang Bombo Radyo Iloilo kay Msgr. Meliton Oso, director sang Jaro Archbishop Social Action Center (JASAC), ginpahayag sini nga sa subong daw kaangay lang nga wala na nahadluk ang mga kriminal sa penalidad nga nagahulat sa ila sa tion nga mapamatud-an nga nakasala.

Ini bangud indi perpekto ang justice system kun sa diin madamu sa mga nakasala ang wala man masilutan.

Apang wala naman nagapati ang simbahan nga ang paghatag sang death sentence ukon silot nga kamatayon ang epektibo sa pagtapna sa kriminalidad.

ILOILO CITY – Ginreklamu sa Bombo Radyo Iloilo sang isa ka concerned citizen ang manunudlo nga si Laila Garcia sa Sibukawan Elementary School sa banwa sang Tubungan, Iloilo bangud sa pagpamintas sa mga estudyante.

Sa interview sang Bombo Radyo Iloilo sa tagreklamu, ginpahayag sini nga ginasakit sang manunudlo ang mga estudyante sini kag masami nagaangkon sang pilas kag lagub sa ila lawas bangud sa kusi kag bakul.

Madugay na nga ginareklamu sang mga ginikanan ang kapintas sang manunudlo apang nahadluk man ang mga ini bangud ginapasuni miembro sang New People’s Army (NPA) ang bana sini.

Luyag kuntani sang mga ginikanan nga sayluhon sa iban nga eskwelahan ang ila ginareklamu nga manunudlo apang ginapasuni wala man ginahatagan pagtamod sang district office sang Department of Education (DepEd) kag malapit man ini sa head teacher sang eskwelahan.

ROXAS CITY – Nagpalapit sa istasyon sang Roxas City PNP ang isa ka dalaga agud ireklamo ang pagbastos nga ginmhimu sa iya sang 50 anyos nga driver sang tricycle nga ginsakyan sini.

Base sa impormasyn nga nakuha sang Bombo Radyo Roxas, mga las 6:00 ang takna kaina sang aga samtang nagasakay sa trciycle nga may city number nga 1700 ang dalaga nga ginkilala lamang sakay alyas nene, ginpapundo sa kilid sang dalan sa bahin sang Hemingway St., Roxas City sang driver ang ginamaneho sini nga tricycle.

Kasunod dire, nagpanaug sa tricycle ang amo nga driver kag nagpalapit sa puno sang kahoy.

Pagdumdom sang dalaga, ini ang pagapangihi, apang amo na lamang ang kakibot sini sang sya ang gintawag sang nasambit nga driver kag ipakita sa iya ang kinatawo sini samtang naga-masturbate.

Sa pagka-ibot kag bangud man indi sini mabilin ang ginbakal nga liquefied petroleum gas (LPG) wala nakadalagan ang amo nga babaye.

Makaligad ang pila ka minutos, kasubong nga wala sang may natabu nga nagbalik sa iya tricycle ang ginrekelamo nga driver kag gindul-ong sini ang iya pasahero sa du-og nga bu-ot sini padulungan.

Sa madasig nga operasyon sang mga pulis, gilayun nga nadakpan ang tigulang nga suspetsado kag ginsulod sa karsel.

Samtang yara sa sulod sang karsel, nagta-as ang blood pressure sini kag nagpakitlo-oy sa biktima nga ini ang pasayluhon.

Naka-angkon sang settlement sa tunga sang mga ini kag nakadesisyun ang biktima nga indi na lamang magpasaka sang panumbungon.

ILOILO CITY – Ginkumpirmar sang Iloilo Provincial Agriculture Office nga naglab-ot sa kapin 31,000 ektarya sang pananum ang nahalitan sang El Niño phenomenon sa probinsya sang Iloilo.

Sa interview sang Bombo Radyo Iloilo kay Dr. Eldefonso Toledo, provincial agriculture officer, ginpahayag sini nga 10,000 ektarya sang pananum ang totally damage samtang 21,000 naman ang mahimu pa nga masalbar.

Sa pihak sang ginalauman nga daku nga epekto sini sa produksyon sang humay sa probinsya sang Iloilo, nagalaum naman si Toledo nga mapahagan-hagan ini paagi sa makabag-o nga teknolohiya, suporta sang gobyerno kag alternatibo nga pamaagi sa pagpanguma.

Nagpanindugan naman si Toledo nga intsakto ang ila ginsomiti nga damage report sa Department of Agriculture (DA) Regional Office 6 may kaangtanan sa epekto sang El Niño phenomenon kasunod naman sang ginpahayag sang ila regional office nga subra ang ginsomiti nga damage report sa matuod nga halit.

ROXAS CITY – Nagakulob kag wala na sang kabuhi sang makit-an ang isa ka security guard mga las 6:30 ang takna sini nga aga sa isa ka pribado nga klinika sa Washington Street, sining ciudad kun sa diin naga-duty.

Ginkilala ang biktima sakay Juan Villagracia, ginabulubanta nga naga-edad sang 55-60 anyos kag residente sang Brgy. Cudian, Ivisan, Capiz.

Sa impormasyon nga nakuha sang Bombo Radyo Roxas, ginasiling nga psible gin-atake sa tagipusu-on ang biktima kag nahulog sa bangko kun sa diin ini nagahigda kag dire dalayun nga ginbawi-an sang iya hulam nga kabuhi.

Ginsiling nga, naka T-shirt kag brief lamang si Villagracia sang ito ini ang makit-an kag nakatakop sa iya dughan ang duha sini ka mga kamot.

Sa karon, ma-id id nga gina-imbistigahan sang mga pulis ang hitabu kag ginahibalo kun may floul play ang ang kamatayun sang biktima.

ROXAS CITY – Nag-abot sa syudad sang Roxas ang mga katapo sang Commission on Filipinos Overseas.

Tuyo sang grupo nga ipahibalo sa publiko ang ginapatigayon nga community education campaign sang ila ahensiya batuk sa human trafficking, illegal recruitment, domestic violence kag inter marriage .

Ginpahanumdum ni Atty Golda Myrna Roma Chief Emigrant Services officer ang mga pilipino nga nagahandum magtrabaho sa iban nga nasyon nga maghalong sa illegal recruiters, bangud madamo na nga mga pinoy ang na-biktima sini sa kagustuhan nga makatrabaho sa iban nga nasyon para mabutong sa kapigaduhon ang ila pamilya.

Suno kay Atty Roma nga wala sang malain sa pagtrabaho sa iban ng nasyon, apang siguraduhon nga indi matuntuhan kag matiplang sang mga illegal recruiters sa pungsod .

Subongman ginpanugyanan sini ang mga pinay nga na-enganyo sang ila ka-chatmates nga ginpromesahan nga pakasalan nga indi gid maglaum sang tuman bangud madamo na sang mga kaso nga narecord nga pag-abot sa lugar sang ila mapangasawa ginaabuso lamang ang mga ini kag kun kaisa ginabaligya pa.

Samtang sa isyu naman sang human trafficking, ginsiling ni Atty Roma nga madamo na sila sang narecord nga kasubong sini nga mga kaso, sa diin kadam-an sa nangin biktima ang mga babae kag mga bata.

ILOILO CITY – Wala nagapati ang Iloilo City Tourism Office nga kulang sa natural nga attraction ang syudad kag probinsya sang Iloilo rason nga wala nalakip sa top 14 tourist destination sa pungsod kun numero sang mga nagapadulong nga turista ang basehan.

Sa interview sang Bombo Radyo Iloilo kay city tourism officer Benito Jimena, ginpahayag sini nga mahimu napaslawan ang syudad kag pagdihon sang estratihiya agud maduso ang mga natural attractions sa syudad kag probinsya sang Iloilo kaangay sang mga baybayon kag busay rason nga indi whole year round ang pagpadulong sang turista sa Iloilo.

Gindugang pa ni Jimena nga ang kakulang sang suporta halin sa mga stakeholders ang isa man sa mga rason kun ngaa manubo ang tour sa Iloilo.

Una diri, ginbasol sang tourism office sa estrikto nga pagsulundan sa trapiko kaangay sang perimeter boundary ordinance sa syudad sang Iloilo ang diutay nga turista nga nagapadulong sa syudad.

ILOILO CITY — Mahimu nga magpasaka sang presyo ang mga water refilling stations sa syudad sang Iloilo may kaangtanan gihapon sa epekto sang tuman nga tig-ilinit.

Suno kay Atty. Franklin Andrada, presidente sang Iloilo Purified Drinking Water and Supplier Association Inc., duha ka water sources ang ila ginakuhaan nga ginalakipan sang shallow water sources sa banwa sang Leganes, Iloilo kag Metro Iloilo Water District (MIWD).

Apang kasunod sang gina-eksperyensya subong nga tig-ilinit, nagnubo na ang supply nga tubig nga ila makuha sa mga shallow water sources samtang may mga bes naman nga nagalab-ot sa tatlo ka adlaw nga indi sila makabaton sang supply sang tubig gikan sa MIWD.

Bangod sini, isa sa ginatan-aw nga option sang asosasyon ang pagpasaka sang bili sang tubig nga ginabaligya agud makabawi.