BACOLOD CITY – All set na ang talatapan sang Commission on Election (COMLEC) Bacolod para sa filing sang Certificate of Candidacy (COC) sumugod subong nga adlaw, Nobyembre 20 kag magatapos sa Disyembre 1.

Suno kay Atty. Ryan Castro, ang election officer sang COMELEC Bacolod handa na ang ila election assitants sa pagbaton sang COCs sang mga kandidato.

Impunto las 8:00 sang aga nagbukas na ang talatapan sang COMELEC kag handa na ang tanan nga personnel kag mga pormas nga kinahanglanon sa filing.

Nagalaum si Atty. Castro nga mangin matalunsay ang filing sa diin may ginpaguwa nga guidelines ang COMELEC sa proceso sang filing kag ginalauman nga ini ang na intiendihan sang mga kandidato.

Ginpanugyanan lamang sini ang mga kandidato nga kompletuhon na ang mga kinahanglanon nga documento ukon papeles sa pag file antes magpadulong sa ila talatapan.

Ginalauman nga diutay pa lang ang maga file sang COC sa una nga mga adlaw kasubong sang kinaandan.

Samtang temprano man nga nagbukas ang provincial COMELEC office sang Negros Occidental kag nakahanda sa pag akomodar sa mga maga file sang COCs.

Sa pihak nga bahin ginalauman ni Atty. Castro nga madula na ang disqualification cases bangod sa pre-mature campaigning kon maaprobahan na ang amendments sang Omnibus Election Code.

Ini bangod isa sa ginaduso nga amendments amo ang pagpahanugot sa mga politiko nga magkampanya apisar wala pa ang campaign period.

ILOILO CITY -  Ginbulabog sang bomb threat ang talatapan sang Government Service Insurance System ukon GSIS sa Iznart Street, Iloilo City, pasado las nueve subong nga aga.

Sunu kay Police Chief Inspector Conrado Carganillo, Chief of Police sang Police Station Number 1, nakabaton sang text message ang Asst. Manager sang GSIS nga nagapahayag may bomba sa ila talatapan.

Ini ang rason kun ngaa nabulabog ang kapin isa ka gatos ka mga pensioner nga naga transaksyon sa ahensya.

Gilayon naman nga nagrespondi ang miembro sang Special Weapon and Tactics ukon SWAT Team kag makaligad ang kapin tunga sa oras, na secure naman ang lugar.

Madamu naman ang nagaduda nga basi ginhungod ang bomb threat agud mabulabog ang madamu nga mga pensioner nga nagareklamu sa ila atrasado nga pension.

Sa impormasyon nga nakuha sang Bombo Radyo Iloilo, subong nga adlaw ang ginpangako sang manager nga si Eleonora Gregorio sa mga pensioners nga mabaton na nila ang ila naatrasar nga pension sa sulod sang pila ka bulan.