ILOILO CITY – Napun-an karon sang anomaliya ang mga proyekto sang gobyerno sa probinsya sang Guimaras bangod sang pagpasakop diri sang ineligible ukon indi kwalipikado nga bidders.

Sa impormasyon nga nakuha sang Bombo Radyo Iloilo, duha sa 13 ka mga bidders sa walo tanan ka mga proyekto sa amo nga probinsya ang natukiban nga ineligible.

Isa sa indi kwalipikado nga contractor amo pa ang nakakuha sang lowest bid sa P35.3M nga balor sang Salvacion-Lucmayan, Guimaras circumferential road project.

Ini amo ang Uy Construction Development Corp. nga ginapanag-iyahan ni Sylvia Uy kag nakabase sa Dumaguete nga nagtanyag sang pinakamanubo nga bid price nga P24M.

Bangod sini ginakahangaw-an nga substandard ang materyales nga gamiton sang amo nga proyekto bangod sang makaduluda nga bid price nga gintanyag sang contractor.

Ginpahayag naman ni Engr. Rolando Asis, director sang Department of Public Works and Highways Region 6, nga wala pa mabaton sang iya talatapan ang natuhoy sa amo nga butang.

Apang ginpaathag sini nga sa tion nga madeklrarar na nga ineligible ang isa ka bidder, ini na ini mahimu pa nga makasakop sa bidding.

Kadungan sini ginpasalig man sang director nga talupangdon ang amo nga anomaliya sa tion nga matipon na ang tanan nga impormasyon tuhoy diri.

ILOILO CITY – Ginpamatbatan sang reclusion perpetua ukon 20 ka tuig kag isa ka adlaw nga pagkabilanggo tubtub 40 ka tuig ang suspek sa pagpatay kay Sheriff Johnny Tugado sang Branch 31 Municipal Trial Court in Cities (MCTC) nga si Larry Mallorca matapos nga mapamatud-an nga guilty sa kaso nga murder.

Matandaan nga si Tugado ang ginpatay tatlo ka tuig na ang nakaligad sa gwa sang balay sini sa Cagbang, Oton, Iloilo.

Ginmanduan man sang korte si Mallorca nga magbayad sang P170,000 nga actual damage, P300,000 nga moral damages kag P75,000 nga indemnity for death.

Ang pamatbat ginpapanaog ni Judge Rene Hortillo sang Regional Trial Court Branch 31.

KORONADAL CITY – Ginarekomendar na sang Department of Agriculture (DA) Region 12 ang gilayon nga pagpatuman sang cloud seeding operation bangud sa El Niño nga nagtuga sang P131 milyon nga damyos sa agricultura sa rehiyon.

Base sa latest monitoring sang DA-12, nag-mala na ang 25, 669 ka ektarya sang agricultural products sa rehiyon humalin sang nagpanalasa ang tag-ilinit sang nagligad nga bulan.

Tuman nga naapektuhan sini ang corn production sang rehiyon sa diin 17, 888 ka ektarya ukon 18 porsyento sang kabug-usan nga 97, 938 ka ektarya sang mais ang gindeklarar na nga indi na mapuslan.

Kapin sa 6, 816 naman ka ektarya ukon singko porsyento sang kabug-usan nga 136, 074 ka ektarya sang palay ang naguba samtang 962 ektarya ukon 43 porsyento sang kabug-usan nga produksiyon sang high-value crops ang nagkaluba.

Yara naman sa 2, 779 ka livestock sa rehiyon ang naapektuhan sang nagkalain-lain nga mga balatian bangud sa tuman ka init sang paniempo.

Bangud sang nasambit nga mga problema, ginpahayag sang DA-12 nga ginakinahanglan na gid ang pagpatuman sang cloud seeding agud nga maluwas pa ang nabilin nga mga pananom kag indi na maglala ang sitwasyon.

BACOLOD CITY – Naglab-ot sa 55 nga katapo sang New People’s Army ukon NPA ang nagsurrender sa 3rd Infantry Division sang Philippine Army sa Western Visayas kag naka avail sang Social Integration Program (SIP) sang gobierno para sa mga rebel returnee sang tuig 2009.

Base sa data nga ginpaguwa sang militar, sa 55 nga nag surrender, 37 diri ang mga Negrense kag 18 ang sa Isla sang Panay.

Nagapakita man sa data nga sang tuig 2009 naglab-ot sa P65.62 milyon ang livelihood package nga ginpanghatag sa idalom sang SIP sang gobierno.

Naglab-ot naman sa 330 nga high powered firearms ang nabawi sang militar sumugod nga ginlunsar ang SIP sadtong 2008.

Ang programa amo ang gindisenyo sang gobierno bilang counter insurgency weapon batok sa mga rebelde.

KORONADAL CITY – Padayon nga nagaayo ang sitwasyon sang ikaayong lawas ni anay Maguindanao Governor Andal Ampatuan Sr. samtang nagapabulong sa ospital sa Davao City.

Ssuno kay Major Randolf Cabangbang, ang spokesman sang eastern mindanao command ukon Eastmincom, padayon nga ginamonitor sang mga doktor ang mga balatian ni Ampatuan Sr. nga diabetes, high blood, chest pain kag iban pa.

Gindugang pa sang opisyal nga nangin maayo ang pagbaton sang lawas sang anay gobernador sa mga medikasyon nga ginahatag sa iya sang doktor.

Bangud sini, ginkumpirmar ni Cabangbang nga preparado kag yara sa maayo nga kondisyon ang lawas ni Ampatuan Sr. sa tion nga igapatawag ini nga magtambong sa ginapatigayon nga hearing sa multiple murder nga ginpasaka batuk kay suspended Datu Unsay Mayor Andal Ampatuan Jr.

BACOLOD CITY – Wala sang namonitor ang Philippine Drug Enforcement Agency (PDEA) nga shabu laboratory sa Bacolod City ukon Negros Occidental.

Ini ang gin klaro ni PDEA region 6 Director Paul Ledesma matapos madiskubre ang 48 ka sako sang chemical kaupod sa shipment sang bugas sang NFA nga kon iproceso mahimo gamiton sa paghimo sang shabu.

May pagduda si Ledesma nga tuyo nga i-stock lang anay ang chemical kag sa ulihi magapatindog sang shabu laboratory.

May posibilidad nga ini ang dal-on man sa iban nga lugar kag ginpaagi anay sa Bacolod City.

Una na nga ginpaathag ni Ledesma nga apisar indi dangerous drug ang chemical form nga n-methyl ephedrine apang ini ang mahimo ipaagi sa chemical process nga ma separar ang compound sa diin ang ephedrine ang ginagamit sa paghimo sang shabu.

Ang monitoring sang PDEA ang gin suportahan man sang PNP nga nagapahayag ng wala sang shabu laboratory sa bug-os nga Negros Occidental.

KORONADAL CITY- Ginkakas sang Department of Agriculture ukon DA Region 12 ang kabalaka sang mga pumuluyo nga magkulang ang supply sang karne sa tion nga maapektuhan sang El Niño ang produksiyon sang baboy, baka kag iban pa nga ginakuhaan sang karne sa Rehiyon 12.

Ginpahayag ni Dr. John Pascual, coordinator sang Ginintuang Masaganang Ani (GMA) Livestock Program, nga ensakto ang supply sang karne sa rehiyon kag preparado ang livestock industry agud nga malikawan ang daku nga epekto sang tag-ilinit.

Ginpaathag pa ni Pascual nga isa ang Rehiyon 12 sa mga ginakuhaan sang karne sang iban nga lugar sa pungsod kasubong sang Cebu, Cavite, Manila, kag Tacloban.

Magluwas diri, nagasuply man sang hinuptan nga baboy kag baka ang rehiyon sa Cagayan de Oro, Iloilo, Cotabato City kag Davao City.

BACOLOD CITY–Kasunod sang nagahilapit nga pagretiro sa serbisyo, ginpahayag ni Armed Force of the Philippines Chief of Staff Gen. Victor Ibrado nga indi na siya mag extend sang termino.

Suno kay Gen. Ibrado nga maga retire na siya sa serbisyo sa maabot nga bulan sang Marso 2010 kag wala sang plano nga magpabilin pa ukon mag extend sang termino bilang AFP chief.

Gin-athag sini nga sa karon wala man sang ginatanyag sa iya nga position sa gobierno ukon posibilidad nga mangin isa sa miembro sang gabinete ni Presidente Gloria Macapagal Arroyo.

Nahibaluan nga maga retire si Ibrado samtang masako na ang preparasyon sa Mayo 10, 2010 presidential election kag madamo ang naga suhestiyon nga dapat iga-extend ang iya termino agod may estable nga liderato ang AFP nga malahalon para sa bug-os nga proceso sang election.

KORONADAL CITY – Nakabatyag sang total black-out ang bug-os nga probinsiya sang South Cotabato humalin pa kagina sang aga bangud sa pagkasunog sang duha ka poste sang National Grid Corporation of the Philippines ukon NGCP.

Ginpahayag sa Bombo Radyo Koronadal ni SOCOTECO 1 General Manager Santiago Tudio nga may nagluntad nga sunog sa golf course sa Matulas, Brgy. Paraiso, Koronadal City kun sa diin nalab-ot ang 59KV line nga ginaagyan sang supply sang kuryente para sa bug-os nga probinsiya.

Sa subong, amat-amat na nga nagbalik ang supply sang kuryente sa pila ka bahin sang probinsiya partikular na ang mga banwa sang Tampakan, Banga, Sto. Niño, Norala kag pila ka bahin sang siyudad sang Koronadal.

Gina-imbestigaran na sa subong ang matuod nga rason sang nasambit nga sunog matapos nga may naguwa nga report nga may nagaka-ingin sa nasambit nga area.