Pinoy Balita

GENERAL SANTOS CITY – Naoperahan na sa ulo si Nonon Loda, ang 19-anyos nga amateur boxer nga na-comatose tungod sa bleeding sa utok, human nakig-sparring session sa usa ka professional boxer nga si Ernie Sanchez sa milabay’ng semana.

Matud pa sa amahan nga si Francisco Loda, naoperahan sa Gensan Doctor’s hospital si Nonon pinaagi sa tabang sa trainer nga si Ben Sonsona.

Aminado si Mr. Loda nga nagpabiling walay kasiguruhan ang sitwasyon ni Nonon luyo nga naoperahan na kini.

Matud pa niini, gaduha-duha gihapon kini nga maka-survive ang anak tungod wala pa gihapon kini nakarecover.

Wala napugngan ni Francisco Loda ang paghilak samtang nanawagan ngadto kang ABAP President Rey Golinggan nga tabangan sila tungod sa ka-daghan sa mga tambal nga gikinahanglan ni Nonon, gawas pa nga didto sa iyahang gymnasium nahitabo ang pakig- sparring session sa pasyente.

Gisaysay pa ni Francisco nga kanunay’ng gihangyo ni Nonon ngadto kanila nga iampo ang iyang kalampusan sa boksing bisan pa kon supak niini ang iyahang inahan.

Matud niini, ang tumong unta sa pagbansay ni Nonon mao ang scheduled fight niini sa Marso, apan dili na matud pa kini mahitabo tungod sa iyahang sitwasyon.